Andecha Astur convoca pa esti domingu 20 d'agostu un actu d’homenaxe a la Declaración pola que’l Conseyu d’Asturies y Llión proclamábase Soberanu ya independizábase a tolos efeutos de la República Española.

L’actu tendrá llugar esti domingu 20 d’agostu  a les 13.30 en Tarna, delantre’l monumentu que fai alcordanza d’esta hestórica declaración del 24 d’agostu de 1937, la postrer proclamación  d’independencia asturiana, pola que’l Conseyu d’Asturies y Llión se declaraba soberanu ya independiente de la República española.

"Artículul 1.- El Conseyu Inerprovincial d’Asturies y Lleón, a partir dela fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdición y a elli queden dafechamente sometíes toles xurisdiciones y muerganismos civiles y militares que foncionen o vaigan foncionar de secute dientru’l mentáu territoriu."

Esta proclamación, que permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, enxamás nun cuntó cola aprebación de la República española, que llegó a considerar un alliviu l’acupación d’Asturies poles tropes facistes.

Andecha Astur llama a participar esti domingu 13 d’agostu nel manifestamientu escontra la tortura pública d’animales.
Dende la refuga dafechu al maltratu animal, ainda más cuando se convierte n’espeutáculu y pretende amarutase como arte, y la denuncia de la collaboración indispensable del Ayuntamientu Xixón pal so caltinimientu, Andecha Astur llama a la sociedá asturiano a manifestase esti domingu 13 d’agostu a les 16:30 h. Plazuela San Miguel -Xixón-.

Arriendes d’ello Andecha Astur quier denunciar que la tortura y muerte de toros convertía n’espeutáculu públicu va escontra la sensibilidá y la cultura asturiana, y el so caltenimientu n’Asturies nun tien otru enfotu que perafitar una espresión de lo “español” nel nuesu país, una forma xabaz d’aculturización y españolización ensin xacíu.

Andecha Astur amuesa la so refuga a trayer al oriente asturianu residuos procedentes del País  Vascu

El proyeutu de creación d'una planta de xestión de residuos na llocalidá de La Peral,en Ribadeva, alluga a Asturies a un nivel d’economía tercermundista, na que cualisquier opción, mesmo la de convertise en basorieru foriatu, ye aceutable.

Nel proyeutu contemplase la creación, a un pasu de les viviendes de La Peral, d`una planta de 10.000 m2 -de los que cubiertos taríen namás 2.167, col consiguiente impautu visual- na que se trataríen alrodiu de 113.000 tonelaes de residuos varios de calter metálicu, procedentes de l`acería y fundición que la empresa Mercantil Hierros y Metales Gutram S.l. caltién nel País Vascu y qu`enagora son procesaos na planta que tienen en Vizcaya.

Escontra lo que la empresa diz nel so proyeutu, la contaminación producida pola xestión de residuos metálicos nuna planta d’esta triba ye importante, tanto a nivel acústicu como ambiental y visual, como puede comprebase nos alrodios de la planta que per agora fai esti trabayu.

La invasión por campistes d'un espaciu especialmente protexíu como ye la Islla'l Bornizal supón un ataque mediuambiental grave a un santuariu d’aves. Como davezu toles autoridaes responsables dan esculpies y los infractores salen impunes, dexando una vegada más n’evidencia cuáles son les prioridaes del “Principado”.

La política de desidia pa col nuesu mediu ambiente ya’l sofitu d’un turismu xabaz, masificáu y de baxu nivel (tamién de baxa rentabilidá) dan  como resultáu lo que tamos viendo esti branu: paraxes naturales nos qu'hai qu’esperar cola pa subir a la peña, playes con miles de coches nos alrodios, caravanes  decenes de kilómetros p’aportar a dalgunos de los entornos más señalaos, pistes de siete metros d’ancho pel medio la viesca… masificación, contaminación, estroza de paraxes, dañu irreversible de la flora, modificación del hábitat de la fauna ¿esti ye’l parayisu que vienden?

Andecha Astur fai un llamamientu a la participación na XXI fiesta de la Oficialidá de Bimenes que se cellebra esti prósimu sábadu 1 de xunetu.

L’exemplu del Ayuntamientu Bimenes, declarando la oficialidá del asturianu y calteniéndola pesia les presiones y represiones, costitúi un exemplu de coherencia y una referencia obligada cara a avanzar pasu ente pasu na reconocencia de los drechos llingüísticos del Pueblu Asturianu.

Na situación d’anguañu, na que PP y PSOE siguen calteniendo’l modelu de represión llingüísticu que carecemos, y Podemos-IU nun acaben de francer cola so política de xestos ensin fechos, mentes Foro y C’s pretender pasar inalvertíos nel conflictu y dexar que too siga igual, el camín de la oficialidá pasa necesariamente por forciar a que los que dicen defender la nuesa llingua, Podemos-IU principalmente, sigan l’exemplu de conceyos como Bimenes, y apreben Ordenances Municipales d’Oficialidá ellí onde o bien formen parte’l gobiernu o tienen capacidá pa condicionalu, lo que supondríe que’l 70% de los asturianos podríemos ver reconocía la nuesa llingua nacional a nivel de conceyu.

Esti forciar a que Podemos-IU cumplan cola so pallabra, que nel so momentu definimos como “Oficialidá, ye tiempu de fechos”, yá ta dando los sos primeros resultaos y de magar entamemos con ello yá s’aprebaren estes ordenances en Mieres y Llaviana. Falten agora polo menos los conceyos de: Castrillón, Grau, Illas, Llangréu, Riosa, Teberga, Uviéu, Xixón.