Andecha Astur apautase al actu d'homenaxe a los lluchaores antifacistes que tien como referencia El Mazucu, llugar onde l’exércitu asturianu, una vuelta independizáu de la República española, llantó cara al exércitu facista español.

L'actu, entamáu por FAMYR Y  Ahaztuak 1936-1977, tendrá llugar esti sábadu 15 setiembre de magar les 13 hores, nel Altu la Tornería, El Mazucu, Llanes, y nel mesmu homenaxearáse a Vicente Gutiérrez Solís, Pepe Lavandera, Xóvenes d’Altsasu, Nagore Laffage, y familiares de Carchuna, faciéndose entrega de los gallardones “María Jesús Suárez Rabanillo”.

Asina mesmo habrá una piqueña obra teatru con testos de Celso Amieva, piqueños monólogos y poemes d’esiliaos y sobrovivientes de la referesión franquista a cargu d’Olalla Sánchez con música de Lomo Callejo, nun faltará tampoco la música’l país cola Banda Gaites Turruxón.

N’El Mazucu tuvo llugar ún de los más heroicos episodios de resistencia al facismu franquista, y a la Llexón Condor, nuna batalla onde l’exércitu del Conseyu Soberanu d’Asturies y Llión, con alrodiu de 5.000 presones y perimportantes carencies materiales, consiguió aparar a un exércitu facista qu'avanzaba victoriosu tres la rendición del gobiernu vascu y la falta de resistencia de Santander.

Andecha Astur camienta que si siempres ye bon momentu pa remembrar a los lluchaores antifacistes, nel casu d'El Mazucu ye una oportunidá ineludible pa reivindicar el Conseyu Soberanu y l'Exércitu Asturianu, -qu'una vuelta lliberaos del xugu de la República española dieren hestóriques muestres de valor y dignidá- y la República Asturiana como un apueste de futuru.