Nun ye ético propiciar que’l Parllamentu Asturianu refugue la Oficialidá del asturianu, col únicu oxetivu de xustificar la so inactividá en tola llexislatura.

La propuesta de Podemos-IU pa entamar yá la reforma del Estatutu pa incorporar la oficialidá del asturianu, a sabiendes de que diba ser refugada, supón marafundiar les fuercies acumulaes na defensa de la oficialidá y dar argumentos a los seutores más reaicionarios que pretenden caltener la situación de represión llingüística que carecemos los asturianos, y lo que ye pior, faelo namás pa xustificar la so falta compromisu en tola llexislatura, na Xunta Xeneral y nos Ayuntamientos.

Una espresión de posturéu non por avezada más xustificable, y que llega a la so másima espresión cuando tres confirmase la persabía refuga del Parllamentu Asturianu, aprovéchase la ocasión pa pidir el votu afirmando que se va facer na prósima llexislatura lo que nun quinxeron faer nesta.

Andecha Astur yá denunció va tiempu que nun había qu’enfotase nuna reforma estatutaria agora mesmo imposible, nin empixar al pueblu asturianu afirmando que la oficialidá diba algamase nel 2018, cuando ye nidio que la correllación de fuercies nun lo permite. Engañar nun ye’l camín y nun val más que pa xenerar desenfotu nuna xera na que la oficialidá ye’l primer pasu, y que nun va ser pa mañana.

Nel mesmu sen, y dende una perspeutiva rialista, Andecha Astur propunxo y propón l’actuación ellí onde ye posible: nos ayuntamientos; y específicamente n’aquellos onde los avances en drechos llingüísticos son posibles, aquellos onde Podemos-IU son gobiernu, formen parte d’elli, o lu condicionen colos sos votos, faciéndolos cumplir coles sos promeses, y pasando del posturéu a los fechos.

Nesti sen, Andecha Astur quier denunciar qu’a finales d’esta llexislatura, estos ayuntamientos que dependen de Podemos-IU tienen reconocíos los mesmos drechos llingüísticos a los sos vecinos que los de PSOE, PP, Foro, Cs, ello ye: dengún. Nin aprebaron ordenances d’oficialidá, nin siquiera reglamentos pa permitir l’usu del asturianu, too quedó en posturéu, detallinos asonsañando “sensibilidá” pal asturianu pero ensin reconocencia de dengún drechu pa los vecinos, bona voluntá ensin avances sociales nin políticos.

Andecha Astur defende una oficialidá ensin complexos pa la llingua asturiana, y acullá de la reforma d’esti Estatutu d’Autonomía que mos impunxeron dende Madrid, defende la so superación al traviés de la llibre elleición pol pueblu asturianu d’un marcu xurídicu-políticu propiu.