L'Homenaxe a Andrés Solar Santuriu xunció lo emotivo colo político nun actu nel que se remembró'l compromisu d'esti nacionaliegu pa con Asturies.

VER SEMEYES

Un detalle floral al llau de la placa que remembra a Andrés Solar nel cimenteriu Deva -Xixón- marcó l'entamu del actu d'homenaxe qu'añalmente fai Andecha Astur a esti hestóricu nacionaliegu, nel que se destacó la vixencia del so pensamientu, 32 años dempués del so fallecimientu, tan bien espresáu na so poesía:

“Prúyemos un pueblu llibre/ que nome cola so voz / los sos collacios y el pan. / Prúyemos un pueblu llibre / y una Asturies dixebrá".

Asina mesmo, reflexonóse cómo'l tiempu va dando la razón a los plantegamientos que defendió dende l'Ensame Nacionalista Astur, cómo la represión llingüística sigue siendo la norma, y la Oficialidá tan llonxana como entós, y cómo se tenía razón cuando'l nacionalismu asturianu denunciaba que'l procesu de "reindustrialización" nun yera otro que l'esfarrapamietu del texíu socio-económicu asturianu y l'anuncia del paru, la emigración forciada y la precariedá llaboral y social. Asina mesmo, tamién se destacó la continuidá del so pensamientu y cómo los plantegamientos nacionaliegos non solo nun s'esaniciaron, sinon que siguen siendo l'únicu referente posible pa francer la situación que carecemos. "Non solo nun mos rendimos, sinon que vamos trunfar, porque ta en xuegu'l nuesu Pueblu, y el futuru pasa necesariamente pola soberanía y el socialismu".

Pel so llau la intervención de Lali Solar, hermana del homenaxeáu, foi especialmente emotiva, compartiendo colos participantes aspeutos destacaos de la so presonalidá, como la humildá que siempres lu carauterizó, y la so permanente dimposición a echar un gabitu a quien lo precisara.

Trenta y dos años dempués del so tempranu fallecimientu, Andrés Solar sigue siendo un referente del nacionalismu comprometíu d'una Asturies que sigue lluchando pol so futuru.