Andecha Astur denuncia que se-y aplique l’impuestu sobro bienes inmuebles, a lo que ye un bien mueble, y anuncia aiciones llegales al respeutu.

Amestar a los problemes pal so caltenimientu y a una llexislación restricitiva que permité’l so usu como almacén y vinculáu a una casa, un impuestu especial por caltener estes xoyes del padremuñu etnográficu asturianu supón de fechu que munchos d’ellos dexaránse cayer, darréu qu’a la falta d’utilidá amiéstase lo abegoso del so caltenimientu y pa enriba un gravame económicu.

Pa enriba, anque los horros y paneres benefíciense de la Llei de Padremuñu Hestóricu Español que llibra del pagu del IBI, con solicitú previa, a aquellos qu’acrediten ser centenarios, como per bien apuntó el Conceyu Por Otra Función Pública n’Asturies (COFPA), lo cierto ye que l’incumplimientu por parte del “Principado” y los propios conceyos de la Llei de Padremuñu Asturianu, permite que la imensa mayoría de los horros asturianos tean ensin catalogar, colo que conseguir demostrar el so calter centenariu ye práuticamente imposible.

Ello asina, añu ente añu espaecen por centenares horros y paneres, énte’l desenfotu non solo del “Principado” sinon de los mesmos Ayuntamientos, qu’a la falta de sofitu y al incumplimientu de les sos obligaciones de conservación y proteición del padremuñu cultural asturianu amiesten agora un desmedíu afán recaldatoriu que propicia’l so esaniciu.