Manifestamientu pola llingua y l'autonomíaLa imposición va 35 años del Estatutu d’Autonomía y la figura del “Principado” dexó a Asturies indefensa frente al colonialismu español.

La istitución del “Principado” y l’Estautu d’Autonomía impuestos dende Madrid y qu’a los asturianos enxamás nun se mos permitió votar, supunxo non solo ñegar la Soberanía asturiana pa decidir llibremente’l so futuru, sinon tamién convertimos en ciudadanos de segunda nun Estáu qu’escontra la razón y la hestoria ñegó a Asturies el so drechu a formar parte de lo que llamaren “Nacionalidaes hestóriques”.

Mentes vascos, catalanes, andaluces, gallegos... pudieron pronunciase sobro’l so propiu estatutu, Asturies, la nación más antigua de lo qu’agora ye l’Estáu español y una de les más antigües d’Europa, quedó condergada a un “Principado” y un Estatutu impuestu que ñega la nuesa hestoria, la nuesa llingua, los nuesos drechos y que mos dexa indefensos frente al colonialismu español.

Ello asina, la cellebración pola Xunta Xeneral y los partíos nella representaos d’esti cabudañu, y la baxuna afirmación de que col  Estatutu impuestu “reafirmóse la identidá y la hestoria asturianes” suponen un auténticu insultu pal conxuntu del Pueblu Asturianu, que ve díi ente díi les consecuencies de nun cuntar con un gobiernu propiu que defenda los intereses d’Asturies, y que carez les consecuencies d’una istitución impuesta valera de competencies y apinada d’incompetentes, cómpliz de los gobiernos de Madrid nel procesu de negación de la nuesa identidá nacional, l’esfarrapamientu del texíu socio-económicu asturianu, la emigración forciada de la mocedá, la precariedá llaboral, la probitú social...

Ello asina, Andecha Astur quier aprofitar esta fecha de vergoña pa perafitar una vuelta más el so enfotu y compromisu cola recostruición nacional y social d’Asturies, denunciar les contines agresiones del Estáu español al Pueblu Asturianu y poner n’evidencia a presones y organizaciones que pretendiéndose asturianes nun son más que sucursales madrilanes na nuesa tierra, enemigos de la nuesa soberanía como pueblu y de la nuesa dignidá como presones.

Puxa Asturies Llibre y Soberana!!