Andecha Astur convoca pa esti vienres 8 setiembre una Concentración y Referendum simbólicu a les 13:30 hores na Plaza la Catedral d’Uviéu.

Asturianu / Español

Cola xida del Díi de la Nación Asturiana, y en reivindicación del Drechu a Decidir, Andecha Astur convoca un actu políticu consistente nuna Concentración y un Referendum simbólicu col que se quier reivindicar el Drechu a Decidir del Pueblu Asturianu, denunciando asina mesmo la situación que carecemos n’Asturies, onde se mos impunxo dende Madrid un ente autonómicu, el “Principado”, y un Estatutu d’Autonomía ensin permití-y al Pueblu Asturianu’l drechu democráticu a pronunciase en referendum, drechu que sí permitieron a gallegos, vascos, andaluces, catalanes.... y que fai de los asturianos y asturianes ciudadanos de segunda categoría.

Andecha Astur persabe que la situación que se vive agora mesmo n’Asturies nun permite falar de procesos costituyentes como’l que ta teniendo llugar en Cataluña -que por supuestu defendemos y sofitamos-, pero ello nun supón más que la necesidá de redoblar los esfuercios p’algamar una situación de reconocencia de los drechos democráticos pal nuesu Pueblu. Na situación d’anguañu, cola izquierda española n’Asturies –toa ella- defendiendo l’ordenamientu xurídicu-políticu que carecemos los asturianos, corremos el riesgu de vemos una vuelta más condergaos a un tercer planu, y que los mesmos partíos sucursal n’Asturies que reconocen la plurinacionalidá nel casu catalán, nun la reconozan p’Asturies, enfotaos en faer del nuesu país un barriu de Madrid.

Algamar la Soberanía, el Drechu a Decidir, ye la única posibilidá de garantizar la nuesa sobrovivencia como Pueblu, y de llevar alantre’l necesariu procesu de recostruición nacional y social que fine cola situación d’anguañu onde les polítiques del Estáu español p’Asturies, cola complicidá y collaboración del “Principado”, tan destruyendo tol texíu socioeconómicu-cultural d’Asturies, y llevándomos a una situación d’auténticu xenocidiu, con decenes de miles d’asturianos obligaos a emigrar añu ente añu, y con otres tantes decenes de miles resistiendo en condiciones de paru y precariedá llaboral y social.

Asina mesmo, Andecha Astur quier faer públicu’l so sofitu a toes y cauna de les iniciatives, actividaes y movilizaciones que se rialicen nesti Díi de la Nación Asturiana y que tean como oxetivu la reivindicación de la nación asturiana y los drechos sociales de los asturianos, comencíos que’l camín pa superar la situación que carecemos ye algamar una xunidá que permita finar col monopoliu de los partíos sucursalistes nel nuesu país, y el so llabor de caltener a Asturies en situación de dependencia y precariedá, al serviciu de los intereses de Madrid.