Tres los postreros datos de contaminación, y la incapacidá manifiesta de la Conseyera de Fomento, amestámosmos al pidimientu de dimisión inmediata de Belén Fernández

Dientru la reinal incompetencia y desenfotu d’un gobiernu sucursal, la Conseyera de Fomento del “Principado” non solo nun ye a controlar los niveles de contaminación que carecemos n’Asturies, sinon que continúa cola so política de ñegación de los fechos –otra vez lo de la “llienda urbana”-, y recurre a midíes tan inaceutables como entrampiar la medición de contaminación, nun dar datos en tiempu rial como ye obligatoriao (pa nun xenerar allarma social diz ella), desinformar, pretender culpabilizar a los ciudadanos de la contaminación –calefación, coches...- y a lo cabero esperar a que la lluvia faiga lo que debiere ser el so llabor, oxetivu que como vien de vese, tampoco nun s’algama.

Cuando les soluciones son tan evidentes y la intención d’aplicales ye nula, y cuando lo que ta en pelligru ye la salú de la población asturiana faise preciso actuar pa pone-y torna a la situación. Ello asina, Andecha Astur que yá fexo públicu’l so sofitu a les Plataformes d’Afeutaos pola Contaminación que van surdiendo, y a les movilizaciones por elles entamaes, amiéstase agora al clamor xeneralizáu desixendo la dimisión de Belén Fernández, Conseyera de Fomentu, faciendo propies les declaraciones de la Coordinadora Ecoloxista cuando pide la so dimisión y desixe actuaciones efeutives, “dexar de tirar el dineru en paneles que nun dicen más que falsedaes y n’estudios que van dicir lo mesmo que los que yá se conocen dende va años”.

Andecha Astur considera que ye urxente dexar de manipular los datos de contaminación, cumplir cola obligación de facilitar esos datos en tiempu rial, actuar escontra les empreses contaminantes d’una vegada y de forma efeutiva, y sobro too una racionalización del consumu, l’apueste firme por enerxíes renovables y un tresporte públicu gratuitu y de calidá.