Nel Díi de la Llingua Materna quedó nidio que la sociedá asturiana ca vuelta ta más comprometío cola llingua d’Asturies. “La Oficialidá ye inevitable ya inegociable”, afirma Lola Suárez.

La cabezalera de la Estaya de Llingua y Cultura Asturiana d'Andecha Astur, valoró perpositivamente la rempuesta de la sociedá asturiana nel Díi de la Llingua Materna cellebráu ayeri, tanto pola fargatada d’iniciatives reivindicando la llingua d’Asturies, como pola claridá cola que s’espresaron, siendo la Oficialidá un requerimientu xeneralizáu: “La sociedá asturiano tien nidio que la Oficialidá ye un puntu partía pa la normalización llingüística n’Asturies, y persabe que tolo que se faiga ensin pasar perí nun son más que maniobres de distraición. A estes altures el “Principado” debiere ser cosciente de que nun engaña a naide, y que la Oficialidá ye inevitable ya inegociable”.

Nesti sen tamién valoró los actos comemorativos entamaos pol “Principado”, “pocos, y probes de conteníos y d’espíritu”, amestando que “lo que pretende’l “Principado” ye siguir perdiendo’l tiempu con actuaciones que nun van a dengún llau, aniciando una rede clientelar al rodiu la llingua y xenerando seudointeleutuales sumisos mentes dexa la llingua nun auténticu guetu dientru d’un marcu de represión llingüística xeneralizada. La sociedá sabe qu’emplegar con normalidá la so llingua va suponer perxuicios sociales, políticos y económicos. Quien facer del asturianu una llingua pa frikis, aldeganos y “terroristes”... too eso mentes se sigue afondando nel procesu de galleguización socio-llingüística del ocidente asturianu”

Nel mesmu sen reiteró que “como acabamos de ver nesti Díi de la Llingua Materna, el Pueblu Asturianu yá ye cosciente de cuala ye la so llingua nacional, y la Oficialidá ye imparable. Tan intentando facer el mayor dañu posible nel tiempu que-yos queda, pero saben que tienen la batalla perdía. Como digo, la Oficialidá ye inevitable ya inegociable”