La campaña turística entamada dende’l “Principado” ye un insultu a los miles de mozos y moces asturianes a los qu’obligaron a emigrar, y una falsedá nel fondu y na forma, tresmitiendo una idega distorsionada de la rialidá asturiana.

Arriendes de lo inaceutable que resulta una campaña de “Torna al Parayisu” pola mesma xente que ta obligando a emigrar a la mocedá asturiano, precisamente d’esi “Parayisu”, dende Andecha Astur vemos inalmisible la mercantilización que dende  Turismu se fae de la ñatura asturiana, al mesmu tiempu que la desdexa y  desprotexe. Ye un contrasentíu aprofitar con fines económicos la  bayura’l nuesu país ya al tiempu consentir toa triba d’abusos a la  mesma.

La falta d’enfotu del “Principado” pa detener les matances d’animales, la cuasi inesistencia de consecuencies llegales ante aiciones  contaminantes, la desforestación propiciada por lleis que non solo nun desenfoten, sinon que premien los incendios forestales, los planes urbanísticos contra natura, l’abandonu d’especies en pelligru, la retirada de fondos a organismos, comu’l CEPESMA, fundamentales pal curiau de la fauna… la llista d’agravios al paisaxe, la flora y la fauna asturianos ye descomanada, ensin escaecer el dañu fechu al componente humanu del paisaxe, la población rural asturiana, que durante sieglos foi parte integrante y proteutora del mesmu.

La campaña carez, amás, d’una ausencia total de presencia de la nuesa llingua, lo que la fae inesistente a güeyos de los sos destinatarios, los potenciales turistes internacionales (como la mesma presentación recalca) qu’aportarán a Asturies con una idega distorsionada y sesgada de la nuesa realidá ya ignorando la nuesa cultura.