El manifestamientu del 1 Mayu tornó a dexar nidio la capacidá de rempuesta del Pueblu Asturianu, y el so enfotu n'algamar un futuru dignu.

Na xornada d’ayeri de nueu quedó nidio l’enfotu nun futuru dignu pal Pueblu Asturianu, la costruición d’un sistema social xustu ya igualitariu y la movilización social en rempuesta a la destruición sistemática del texíu económicu asturianu, el paru, la precariedá llaboral y la emigración forciada de decenes de miles d’asturianos añu ente añu.

Acullá de cencielles reclamaciones salariales, y de la defensa concreta d’empreses en cris, la movilización del sindicalismu combativu asturianu tresmitió la necesidá d’una visión conxunta, del atalantar que toles lluches son la mesma llucha, y qu’a la fin de lo que se trata ye de responder a les trampes del capital dende la nuesa duple condición de trabayaores y asturianos.

Andecha Astur tornó a participar activamente xunciendo a esta postura la reivindicación de la Soberanía nacional como únicu camín na defensa d’un futuru dignu pal Pueblu Asturianu, la supervivencia d’Asturies como nación y la costruición d’un sistema xustu ya igualitariu, porque sabemos que vivir y trabayar n’Asturies, y faelo nunes condiciones afayaíces, ye una reivindicación inegociable.

Por eso, una vegada más, tornamos a dicir Puxa'l Pueblu!! porque esi pueblu ye'l que tien el futuru nes sos manes, ye'l nuesu pueblu y con elli taremos na defensa d'un futuru dignu p'Asturies y los asturianos y asturianes.