Andecha Astur llama a participar nel manifestamientu pola Oficialidá del asturianu convocáu coincidiendo col Díi de les Lletres Asturianes, y felicita a l’Academia de la Llingua Asturiana

Un añu más, Andecha Astur fai un llamamientu a la sociedá asturiana a participar nel manifestamientu pola Oficialidá de la llingua d’Asturies entamáu coincidiendo cola cellebración del Díi de les Lletres Asturianes (vienres 5 de mayu a les 19:30 na Estación del Norte. Uviéu) nel convencimientu de qu’agora más que nunca faise preciso la movilización social pa francer la política llingüística del PSOE nel “Principado” y consiguir avances granibles na normalización democrática en materia llingüístico. Normalización que pasa necesariamente pola Oficialidá de la nuesa llingua.

Agora mesmo atopámosmos nuna situación enforma complicada, na que’l “Principado”, arriendes d’avanzar na galleguización del ocidente asturianu, pretende camudar los oxetivos d’Oficialidá, ello ye, la reconocencia de los drechos llingüísticos de los asturianos, por oxetivos parciales ensin repercusiones llegales, que permiten el llucimientu, o’l beneficiu presonal, pero que ñeguen la custión fundamental pa la supervivencia de la llingua asturiana: la reconocencia del drechu de los asturianos a emplegar la so llingua nel so país.

Nesi sen, tamién denunciamos el posturéu de cargos públicos y partíos políticos que, diciendo ser favoratibles a la Oficialidá, llimítense a faer declaraciones ensin conteníu práuticu, y a rializar actos “simbólicos” ensin repercusión dala, mentes que nos cargos qu’acupen, y col poder políticu que los asturianos-yos apurrieron, el so llabor de reconocencia de la llingua asturiana ye nulu. Ello asina, y por exemplu, denunciamos qu’en dengún de los ayuntamientos onde IU-Podemos caltienen d’una o otra forma el gobiernu del conceyu esiten Ordenances Municipales d’Oficialidá reconociendo’l drechu de los vecinos a falar na so propia llingua.

Per otru llau, con motivu d’esti Díi de les Lletres Asturianes, Andecha Astur unvió una nota de felicitación  a l’Academia la Llingua Asturiana que diz asina: “Con motivu del Díi de les Lletres Asturianes, Andecha Astur quier aprovechar la ocasión pa felicitar a l’Academia de la Llingua Asturiana pol so importante llabor nel estudiu, dignificación y defensa de la nuesa llingua, en tol territoriu nacional, y na defensa de los drechos llingüísticos de los asturianos. Andecha Astur perafítase nel so compromisu pa cola llingua asturiana, de la unidá llingüística de la mesma en tol territoriu asturianu y na necesidá d’algamar la OFICIALIDÁ comu drechu democráticu, y pasu imprescindible cara a la normalización democrática d’Asturies y al necesariu procesu de recuperación llingüística nel nuesu país.”