Asturianu / Español

L'acabante cellebración del Díi de les Lletres Asturianes tien que marcar un puntu d'inflexón ente les polítiques de xestos y la política de fechos y drechos. Valió de posturéu.

Cuando ye nidio que PSOE y PP nun van camudar la so posición respeutu a la llingua d'Asturies con matices a la hora d'aplicar la so represión llingüística y cuando yá fadia'l continuu posturéu y les declaraciones tan grandilocuentes como inútiles de los que dicen ser favoratibles al reconocimientu democráticu del asturianu, ello ye, la Oficialidá -Podemos, IU- faise preciso francer con esa dinámica de xestos ensin fechos y forciar el compromisu de quien, tando nes sos manes avanzar na reconocencia llegal y na normalización social de la nuesa llingua, prefier quedar nuna política de xestos ensin fechos.

Nesi sen, les iniciatives empobinaes a entamar una reforma estatutaria pa reconocer la Oficialidá del asturianu paecen nun principiu afayaíces, darréu que ye posible entamar con ello cuntando con 12 diputaos, daqué que sobropasen ente Podemos (9), IU (5), y supónse que FA (3), pero tamién ye cierto que p'aprebar una reforma del estatutu (esi estatutu impuestu dende Madrid y qu'enxamás nun dexaron votar al Pueblu Asturianu) fain falta un mínimu de 27 votos favoratibles, lo que torna otra vegada a dexar en manes de PP/PSOE que seya una rialidá. Ello va a suponer que tou esi procesu de "reforma imposible" acabe siendo otra campaña de posturéu pal llucimientu de Podemos ya IU, que finará ensin dengún avance, y a costa de más frustración social.

Ello asina, y sabiendo d'antemán onde va llevamos semeyante iniciativa, Andecha Astur plantega que p'avanzar na reconocencia llegal del asturianu ye preciso forciar precisamente a aquellos que presumen de defendelu y lu aprofiten mediáticamente, pero que nun fain un res por ello na so política diaria. Vamos desixi-yos qu'ellí onde'l Pueblu Asturianu-yos dio la responsabilidá de representalu, seyan consecuentes políticamente colo que dicen defender.

Y ye que agora mesmo, los ayuntamientos onde eses fuercies cunten col gobiernu, formen parte d'elli, o lu condicionen, los drechos llingüísticos reconocíos llegalmente a los vecinos son los mesmos que los de los Ayuntamientos del PP o'l PSOE: dengún.

Tamos falando de drechos, non de xestos simpáticos como sacar un cartelín n'asturianu, la rotulación billingüe, o más sovenciones. Falamos d'Ordenances Municipales d'Oficialidá, que reconozan drechos ciertos a los vecinos, siguiendo l'exemplu d'ayuntamientos como Bimenes o Noreña. Ordenances que nun tien dengún xacíu presentales ellí onde la representación municipal faeles imposible prosperar, y nun busquen más que siguir cola política de xestos ensin fechos -Avilés por exemplu-, y sí nos que gobiernen o cunten con mayoría abonda pa que puean salir alantre, bien con Foro, bien con representantes municipales del PP/PSOE o d'otres formaciones cuyu compromisu democráticu  tea perriba del odiu a tolo que seya asturiano.

Esi ye'l camín. Hai que forciar a la coherencia. Que dexe de salir gratis el llucimientu políticu y qu'escomience a faese efeutivu ellí per onde ye vidable.

Nun mos metamos en griesques que sabemos perdíes d'antemán y que namás van valir pa que se lluzcan los que tovía nun fixeron un res, desixámos-yos a esos profesionales del xestu mediáticu y la pallabra valera, que cumplan con aquello de lo que presumen. Nun mos enfotemos nuna reforma estatutaria agora mesmo imposible, enfotémosmos nos ayuntamientos, y concretamente n'aquellos onde ye posible, polo menos n'aquellos onde Podemos ya IU son el gobiernu, formen parte d'elli o lu condicionen: Castrillón, Grau, Illas, Llangréu, Mieres, Riosa, Teberga, Uviéu, Xixón.... lo qu'afeuta direutamente a más del 70% de la población asturiano.

Avancemos!