Andecha Astur fai un llamamientu a la participación na XXI fiesta de la Oficialidá de Bimenes que se cellebra esti prósimu sábadu 1 de xunetu.

L’exemplu del Ayuntamientu Bimenes, declarando la oficialidá del asturianu y calteniéndola pesia les presiones y represiones, costitúi un exemplu de coherencia y una referencia obligada cara a avanzar pasu ente pasu na reconocencia de los drechos llingüísticos del Pueblu Asturianu.

Na situación d’anguañu, na que PP y PSOE siguen calteniendo’l modelu de represión llingüísticu que carecemos, y Podemos-IU nun acaben de francer cola so política de xestos ensin fechos, mentes Foro y C’s pretender pasar inalvertíos nel conflictu y dexar que too siga igual, el camín de la oficialidá pasa necesariamente por forciar a que los que dicen defender la nuesa llingua, Podemos-IU principalmente, sigan l’exemplu de conceyos como Bimenes, y apreben Ordenances Municipales d’Oficialidá ellí onde o bien formen parte’l gobiernu o tienen capacidá pa condicionalu, lo que supondríe que’l 70% de los asturianos podríemos ver reconocía la nuesa llingua nacional a nivel de conceyu.

Esti forciar a que Podemos-IU cumplan cola so pallabra, que nel so momentu definimos como “Oficialidá, ye tiempu de fechos”, yá ta dando los sos primeros resultaos y de magar entamemos con ello yá s’aprebaren estes ordenances en Mieres y Llaviana. Falten agora polo menos los conceyos de: Castrillón, Grau, Illas, Llangréu, Riosa, Teberga, Uviéu, Xixón.

Y ye que na situación na que mos afayamos agora mesmo, con un PSOE remocicando toles sos vieyes glories –les que tovía nun pasaron polos xulgaos- y un PP que yá nun revuelve col desafíu del soberanismu catalán, conseguir que les formaciones que dicen defender la Oficialidá de la llingua, Podemos, IU, ya inclusu Foro, pasen de los dichos a los fechos pue permitir superar la situación de bloquéu democráticu en materia llingüístico al que se ve sometíu’l pueblu asturianu, y algamar la Oficialidá de la llingua en tol país, como un primer pasu, cara a la normalización llingüística de la nuesa llingua nacional.

Ello asina, encamentamos a la participación nos actos entamaos en Bimenes pa esti xábadu 1 de xunetu, de magar les 12 del meudíi.