Andecha Astur comparte con otres formaciones como la Cordinaora Ecoloxista la satisfaición pola renuncia del PSOE a la icineraora, pero alvierte de que tará sollerte énte cualisquier propuesta que contemple la quema basories.

Consiguir, tres ventidos años de llucha, que'l PSOE renunciare a la icineraora como opción pa tratar los residuos urbanos, sabiendo amás lo muncho que se xugaba esi partíu pal caltenimientu de la so rede clientelar y la financiación del aparatu, supón un trunfu del que necesariamente sentímosmos satisfechos.

Les polítiques aplicaes pol PSOE dende'l "Principado" fixeron del nuesu país un territoriu de los más contaminaos d'Europa, y a la cola en calidá d'aire por partícules, nes tases de reduición de residuos, del reciclaxe y de la inversión en programes de concenxación y educación ambiental, y la icineraora yera la so única alternativa, ente otres custiones porque garantizaba'l caltenimientu de la so rede clientelar y el financiamientu del aparatu, puertes xiratories incluyíes, al traviés de les cementeres principalmente.

El nuevu plan agora presentáu con ser meyor que'l previu, nun lleva bon camín, de fechu namás contempla reciclar un llímite de 300.000 tonelaes de les 610.000 tonelaes de residuos añales que xeneramos nel nuesu país, y plantega amburar el restu nes térmiques, colo que podríemos tar énte una incineración encubierto que beneficiaríe namás a les cementeres, y a los que pretenden sacar réditos d'elles.

Tamos ciertos de qu'eso nun ye una solución y tamos sollertes dende un entamu a cualisquier propuesta que nun siga la Direutiva Marcu Europea pa les basories: prevención, reutilización, recicláu y a lo postrero eliminación, coscientes de que'l PSOE ta a la gueta d'utilizar el tratamientu de les basories en beneficiu propiu, con total despreciu del interés d'Asturies y del Pueblu Asturianu.