La llectura de los sos poemes al llau de la tumba del hestoricu nacionaliegu dieron especial emotividá a un actu nel que Paulo Arboleya faló d'organización y futuru.

VER SEMEYES

La cita añal del nacionalismu asturianu homenaxeando a Andrés Solar, presonaxe de reconocíu prestixu lliterariu del que polo xeneral suel tapecese'l so fondu compromisu nacionaliegu, collaboraor nel aniciu del Ensame Nacionalista Astur y compañeru de partíu de munchos de los qu'agora formen parte d'Andecha Astur.

Esti añu l'actu entamó cola llectura de dellos de los sos poemes por neños, tres lo cual, y yá delantre la placa llantada por Andecha Astur a la puerte'l cimenteriu, yá en 2004, procedióse a remembrar la figura d'esti hestóricu nacionaliegu faciendo delles considerances sobro la so hestoria de llucha y compromisu, pa siguir cola intervención de Paulo Arboleya que de magar la figura d'Andrés Solar fexo un respasu a la rialidá d'anguañu, con especial mención a los que quinxeron ver en "sucursalismos progres" una alternativa pal nuesu país, y de los que dixo, espera qu'una vegada comprebao la inutilidá de la so sumisión a los mandatos de Madrid, asuman la so responsabilidá pa con Asturies y la necesidá d'articular alternatives polítiques asturianes dafechu. "Yá ta bien de sumisión por sacar una conceyalía qu'a la fin nun va a dengún llau".

Nesi sen afitó'l compromisu d'Andecha Astur de siguir trabayando por articular una alternativa política con capacidá de representación istitucional que complemente'l llabor de la sociedá asturiana en defensa de los sos llexítimos drechos ya intereses como Pueblu, puxando siempres pola Soberanía y el Socialismu.