Andecha Astur sofita la convocatoria fecha pola Xunta la Defensa la Llingua Asturiana pa desixir la Oficialidá de la llingua nacional d’Asturies

Andecha Astur ye l’únicu partíu qu’hestoricamente, dende l’entamu ya ensin dubies nin arrodios defende la llingua asturiana tanto a nivel revindicativu como de fechu, siendo los únicos que presentamos les papeletes pa les elleiciones na nuesa llingua –ganando nel Tribunal Costitucional el podre exercer esi drechu-, por más qu’en munches ocasiones –como foi nes pasaes elleiciones nacionales- ello supunxera la retirada de les nueses papeletes,  polo que ta nidio que sofitamos el manifestamientu convocáu pal 21 d’abril en defensa de la llingua nacional, asina comu’l viniente que coincidirá col Díi les Lletres.

Afalamos a tola población asturiana a acudir al manifestamientu que se cellebrará n’Uviéu el prósimu sábadu 21 d’abril pa desixir el reconocimientu llegal de los drechos llingüísticos de los asturianos y afalamos igualmente a tolos partíos políticos y asociaciones que participarán na convocatoria a pasar del posturéu a la aición, concretamente a nivel de Conceyu, onde en cuentes d'aprebar "proposiciones de apoyo" que nun van a dengún llau ye preciso aprebar Ordenances que garanticen los drechos llingüísticos de los vecinos; arriendes d'emplegar l’asturianu nes sos comunicaciones y poniendo los medios al so algame pa que la Oficialidá seya un fechu.

Tamos ciertos de que si partíos comu IU, Podemos ya’l PSOE tuvieren una braera voluntá política de defender la llingua nun habría dala torga p’algamar la Oficialidá, como llexítimamente mos correspuende y comu’l pueblu asturianu lleva demandando va décades, superando l’anormalidá democrática agora mesmo esistente.