Andecha Astur llama a la participación nel manifestamientu convocáu nel Díi de les Lletres Asturianes defendiendo una Oficialidá ensin complexos y ensin plazos.

Nunos intres nos que la reconocencia de los drechos llingüísticos del Pueblu Asturianu preséntensemos ca vuelta más prósimos, cola Oficialidá de la nuesa llingua nacional como primer pasu, Andecha Astur llama a movilizase nesti Díi de les Lletres Asturianes por una Oficialidá dafechu, denunciando los intentos de vaciala de conteníu colo qu’agora tan dando en llamar una oficialidá “amable”, “a plazos” o “a l’asturiana”.

La Oficialidá nun ye negociable, ye un drechu humanu internacionalmente reconocíu que se mos ta ñegando a los asturianos y asturianes y que nun almite medies tintes. Nun vamos entrar nel xuegu del “costu que pueda tener”. El costu imensu ye’l qu’agora mesmo carecemos con una represión llingüística sistemática y nuna situación d’esaniciu de la nuesa llingua.

Asina mesmo, tampoco nun hai por qué ñegar les implicaciones que la Oficialidá de la llingua va tener. El respetu a los nuesos drechos llingüísticos desixe cuntar con medios, tanto económicos como humanos, y lo mesmo que se fexo notres naciones del Estáu, n’Asturies tendrá que faese un esfuerciu pa garantizar que la oficialidá seya rial.

Per otru llau, tampoco nun vamos escaecer qu’agora mesmo, los partíos políticos que se posicionen favoratiblemente a reconocer la oficialidá, tampoco nun tan faciendo un res, fixándola nel meyor de los casos na prósima llexislatura. Nesi sen reiteramos la necesidá de forcialos a la coherencia. Que dexe de sali-yos gratis el llucimientu políticu y qu'escomience a faese efeutiva la oficialidá ellí per onde ye vidable.

Nun mos enfotemos namás nuna reforma estatutaria agora mesmo imposible, enfotémosmos nos ayuntamientos, y concretamente n'aquellos onde ye posible, polo menos n'aquellos onde PSOE,  Podemos ya IU son el gobiernu, formen parte d'elli o lu condicionen.... lo que supondría que  más del 70% de la población asturiano vería reconocíos los sos drechos a nivel de conceyu.

Por eso, esti vienres 4 de mayu, manifestarémosmos n’Uviéu, a les 19:30 na Estación del Norte. ¡Por una oficialidá ensin complexos! ¡Llingua Nacional, Llingua Oficial!