Andecha Astur convoca pa esti sábadu 25 d'agostu en Tarna, el tradicional  actu d’homenaxe a la Declaración pola que’l Conseyu d’Asturies y Llión proclamábase Soberanu ya independizábase a tolos efeutos de la República Española.

Esti añu l'actu tendrá dos partes estremaes: A les 11:00 procederáse a xubir a les trincheres de L'Abidular dende onde l'exércitu del Conseyu Soberanu defendió'l país frente a les tropes franquistes, y a les 13:30 delantre’l monumentu que fai alcordanza d’esta hestórica declaración del 24 d’agostu de 1937, aniciu d'una auténtica República Asturiana.

Con esti actu homenaxease la hestórica declaración, fecha'l 24 d'agostu de 1937, pola que'l Conseyu d'Asturies y Llión declarábase soberanu ya independiente de la República española:

"Artículul 1.- El Conseyu Inerprovincial d’Asturies y Lleón, a partir de la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdición y a elli queden dafechamente sometíes toles xurisdiciones y muerganismos civiles y militares que foncionen o vaigan foncionar de secute dientru’l mentáu territoriu."

Esta proclamación soberanista que permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, enxamás nun cuntó cola aprebación de la República española, que llegó a considerar un alliviu l’acupación d’Asturies poles tropes facistes.

La falsa transición política cola que continuó’l franquismu non solo nun permitió recuperar esta auténtica istitución d’autogobiernu, sinon qu’impunxo dende Madrid –ensin que’l Pueblu Asturianu pudiere votalo- un “Principado” y un Estatutu descontestualizáu hestoricamente y sociolóxicamente ayenu a la sociedá asturiana, condergándomos a la situación de colonialismu que carecemos anguañu.

Frente al papel de la izquierda española n’Asturies, asumiendo l’agresión a la dignidá y la soberanía asturiana que supón el “Principado” impuestu, Andecha Astur reclama’l Conseyu Soberanu como la última istitución democrática del Pueblu Asturianu, y la soberanía como un drechu inrenunciable imprescindible p’afitar el nuesu futuru como Pueblu, perafitándose na reivindicación de la República Asturiana.

Sábadu 24 d'Agostu Tarna. Casu.

11:00 Ascensu a les trincheres de L'Abidular

13;30 Homenaxe delantre'l monumentu del Conseyu Soberanu

 

Pa facilitar la participación ta faciéndose por contratar un autocar, si tas interesáu/ada ponte en contautu con nós nel mail Esta dirección de correo electrónico está siendo protegida contra los robots de spam. Necesita tener JavaScript habilitado para poder verlo.