“El reinu que ñaz en Cuadonga, el d’Asturies, ye una apuesta independiente, un proyeutu políticu propiu d’un poder nuevu y estremáu. Pelayo nun entama denguna reconquista. España nun existía, nun podía reconquistase”

En Cuadonga ñaz el primer estáu configuráu na Península Ibérica depués del esbarrumbe del estáu visigodu. Si eso pasare’n cualisquier otra nación hestórica de la Península Ibérica esi datu sabríemoslo toos de memoria, anquen nun foremos d’ellí. La repercusión d’esi fechu dura entá, pero foi namás el primeru de munchos fechos hestóricos acaecios nel que ye ensin dubia el más llugar con más fuercia simbólica del país.

Na conferencia que tuvo llugar ayeri en Xixón los dos ponentes, Mariano Suarez y Roberto González Quevedo, desgranaron una perllarga riestra de datos antropolóxicos ya hestóricos que debuxen una Cuadonga fuertemente lligada al sentir identitariu asturianu, pero que tamién espeyen el fuerte enfotu de la monarquía española de facese col poder que remana esi símbolu. Dende 1857 Cuadonga recibió la visita de 16 miembros de la monarquía española, más la de Franco -a quien Mariano inclui na dinastía- una frecuencia qu’espeya la insistencia española de remanar pa si una hestoria que nun ye la de so.

“Siempres quinxeron enllazase con Pelayo, les monarquies débiles tienen que buscar recursos pa caltenese un discursu creyible y tratar de tapecer los orixenes vergoñosos”.

Tendrá llugar esti xueves 6 de setiembre na Sala Conferencies del Antiguu Istititutu Xovellanos -Xixón- de magar les 19:00.

Los intentos de la monarquía española de reivindicase nesti Díi de la Nación Asturiana presentándose en Cuadonga como continuadora del Reinu d'Asturies, ya incluso de la propia monarquía asturiana y apropiándose d'ún de los principales referentes simbólicos, míticos y hestóricos de la nación asturiana son les xides que xustifiquen esta conferencia na que se procederá a desmontar non solo la belurdia hestórica que representa'l cuadonguismu españolista, sinon afitar tamién la trescendencia que tien Cuadonga como referente pal Pueblu Asturianu.

Na conferencia intervendrá Llucía Fernández en representación d'Andecha Astur y los ponentes:

 Roberto González-Quevedo filósofu, doctor n'antropoloxía y llingüísta, miembru de númberu de l'Academia de la Llingua Asturiana ocupando'l cargu de secretariu, y direutor de la revista Cultures, y cuya intervención entitúlase "Cuadonga y la so mitificación"

Mariano Suárez, mayestru, autor d'obres imprescindibles de la historiografía asturiana como "¿Quién escaeció a Belarmino Tomás?" , y cuya intervención nesta conferencia lleva per entítulu "¿Por qué Asturies tien 10 Cuadongues?"

L'actu de comemoración de la Declaración d'Independencia del Conseyu Soberanu d'Asturies y Llión sirvió pa vindicar la República Asturiana como apueste de futuru.

VER SEMEYES

L'ascensu a les trincheres de L'Abidular a primera hora de la mañana, la visita a la casamata defensiva de Tarna, l'homenaxe floral y la intervención política marcaron una xornada reivindicativa na que tamién hebio una importante presencia llionesa.

La Maginot Cantábrica, les trincheres defensives de la cordillera asturiana na que demientres 16 meses consiguieron aparar l'exércitu franquista, foron l'oxetu primeru d'esta xornada d'homenaxe y reivindicación. Ascendiendo a los más de 1.800 metros,  comprobóse in situ lo heroico de la resistenciademientres la Guerra Civil nunes condiciones tan dures, dempués, la visita a la casamata de Tarna, como parte del sistema defensivu qu'impidió'l pasu al exércitu facista, y darréu l'homenaxe floral nel monumentu asistiáu na llende d'Asturies y Llión,nel que como vien siendo avezao, acudieron llioneses a recordar lo que tamién ye parte de la so hestoria.

Na intervención política de Marcos Fernández, recordáronse los fechos hestóricos que s'homenaxeaben, pero tamién y l'esfuerciu heroicu d'un exércitu y un Pueblu, que como afirmó "nun yeren seres estraordinarios, yeren los nuesos güelos y güeles, fueren ellos los que dieron esti exemplu de compromisu y llucha. Pudieron facelo porque nellos alendaba un proyeutu de cambiu social, anarquista, comunista, socialista, o cenciellamente de xusticia social. Teníen un proyeutu y cuando'l Conseyu Soberanu se declaró independiente tamién tovieren un territoriu, una patria que defender. D'ende la so fuercia, per ende'l so heroismu".

Andecha Astur intensifica la campaña na cai con cartelos, pancartes, pegatines y camisetes

Énte'l remanamientu pola Corona española de Cuadonga presentándose'l Díi de la Nación Asturiana como llexítimos herederos del Reinu d'Asturies, Andecha Astur intensifica la campaña de denuncia del remanamientu hestóricu y  de reivindicación de la República Asturiana na cai con cartelos, pancartes, pegatines y camisetes, qu'inclúin los hashtags #YeAsturies #Asturiesnuntienrei #RepublicaAsturiana.

L'oxetivu ye movilizar a la sociedá asturiana pa que'l prósimu 8 setiembre respuenda  a la convocatoria republicana y participe nes movilizaciones entamaes -marcha dende Les Arriondes a Cangues d'Onís y concentración en Cangues d'Onís- baxo la convocatoria xunitaria de "Asturies nun tien rei" propuesta pol colleutivu Lluchando pola Soberanía y cola que se vienen apautando estremaes fuercies polítiques, sociales, sindicales, culturales...  que fain suya la reclamación d'una República frente a la monarquía española.

Nesi sen hai de remembrar qu'Andecha Astur tien entamao una Conferencia'l al rodiu de lo que representa Cuadonga como símbolu identitariu asturianu y cómo la monarquía española fai usu d'ella,  apropiándose d'ún de los principales referentes simbólicos, míticos y hestóricos de la nación asturiana. Na conferencia intervendrán Llucía Fernández, Mariano Suárez y Roberto González-Quevedo, y tendrá llugar el prósimu 6 de setiembre na Sala Conferencies del Cientru Cultura Antiguu Istitutu de Xixón, de magar les 19:00 h.

Andecha Astur convoca pa esti sábadu 25 d'agostu en Tarna, el tradicional  actu d’homenaxe a la Declaración pola que’l Conseyu d’Asturies y Llión proclamábase Soberanu ya independizábase a tolos efeutos de la República Española.

Esti añu l'actu tendrá dos partes estremaes: A les 11:00 procederáse a xubir a les trincheres de L'Abidular dende onde l'exércitu del Conseyu Soberanu defendió'l país frente a les tropes franquistes, y a les 13:30 delantre’l monumentu que fai alcordanza d’esta hestórica declaración del 24 d’agostu de 1937, aniciu d'una auténtica República Asturiana.

Con esti actu homenaxease la hestórica declaración, fecha'l 24 d'agostu de 1937, pola que'l Conseyu d'Asturies y Llión declarábase soberanu ya independiente de la República española:

"Artículul 1.- El Conseyu Inerprovincial d’Asturies y Lleón, a partir de la fecha y hora de la promulgación d’esti decretu, costitúise en Conseyu Soberanu de gobiernu tol territoriu de la so xurisdición y a elli queden dafechamente sometíes toles xurisdiciones y muerganismos civiles y militares que foncionen o vaigan foncionar de secute dientru’l mentáu territoriu."

Esta proclamación soberanista que permitió qu’Asturies entamare un auténticu procesu revolucionariu y se defendiera heróicamente del exércitu facista español/italianu/alemán, enxamás nun cuntó cola aprebación de la República española, que llegó a considerar un alliviu l’acupación d’Asturies poles tropes facistes.