Les sos idegues y les pallabres que dexó escrites son vixentes dafechu

Nel 34 cabudañu del fallecimientu d'Andrés Solar, Andecha Astur homenaxeó delantre la placa que lu recuerda nel cimenteriu Deva, a esti nacionaliegu asturianu que, al so compromisu social y políticu, amestó una obra lliteraria autodidacta y n'asturianu d'especial valir.

Precisamente, chando man d'esta obra lliteraria, la intervención política de Llucía Fernández foi repasando l'actual situación social, llaboral y demográfica d'Asturies atopando, nes palabres escrites por Andrés Solar hai más de 30 años, una descripción tan "profética" que les fai dafechu acertaes y actuales.

Mentes lleía l'hestóricu poema "Prúyemos un Pueblu Llibre" Llucía Fernández fizo un altu nel versu  "Xunto la fábrica encesa,/ la mina prieta..." pa remembrar que precisamente güei, el Reinu d'España vien de presllar les dos postreres mines asturianes, dexando un ermu de paru, precariedá y emigración forciada;  con pallabres perdures pal presidente español, Pedro Sánchez, que tovía s'atrevió afirmar qu'ello diba acarretar prosperidá "Prosperidá pa los Villa, pa la Mafia político-sindical asturiana que cobró por collaborar nel preslle de la minería asturiana, pa la Mafia'l PSOE-SOMA-UGT; prosperidá pa Madrid que se quedó colos más de los Fondos Mineros, prosperidá que ye miseria p'Asturies, pa los asturianos"

 Esti sábadu 29, Andecha Astur reivindicará la figura d'Andrés Solar como presona y como nacionaliegu comprometíu

A les 13 hores, y nel Cimenteriu de Deva –Xixón-, Andecha Astur reivindicará la dimensión nacionaliega d’Andrés Solar Santurio, escritor de merecíu y reconocíu prestixu nel ámbetu lliterariu asturianu del que por embargu suel tapecese’l so fondu compromisu políticu que lu llevó a ser miembru fundaor del Ensame Nacionalista Astur, presentándose por esi partíu como candidatu a la Xunta Xeneral..

D’elli ye la conocía poesía que tan bien espeya'l sentir y los enfotos del nacionalismu asturianu

 “Prúyemos un pueblu llibre/ que nome cola so voz / los sos collacios y el pan. / Prúyemos un pueblu llibre / y una Asturies dixebrá.

La xornada d’ayeri en Noreña foi un auténticu espaciu d’alcuentru, información y alderique.

VER SEMEYES

L’entamu con un murial popular firmáu por Andecha Astur y Conceyu Abiertu por Noreña dio pasu a una xornada na que su cumplieron los oxetivos d’algamar un espaciu d’alcuentru, participativu, onde los asistentes fueron en tou momentu los principales actores y onde la República Asturiana y la mocedá nacionaliega foron los principales protagonistes.

La primer intervención “12 xides pa la República Asturiana”, a cargu de Mariano Suárez, punxo los pegollos nos que s’afita esta reivindicación hestórica del Pueblu Asturianu, y tuvo un corolariu especialmente interesante nel alderique que vieno darréu, onde ente otres coses, tratóse de la situación d’esi nacionalismu asturianu qu’acabó siendo una sucursal madrilana “ente lo asturiano y lo español hai una llinia de separtación, caún ye llibre de ponese onde-y paeza afayaízo, y mesmamente ponese a ún o a otru llau les vegaes que-y peta. Lo que nun ye llícito ye cruciar la llinia y dicir que se ta onde se taba, o que la llinia nun esiste”.

Ente la discriminación que supón que’l peaxe d’El Güerna non solo nun esapaeza -como ta ocurriendo con otres autopistes del Estáu- sinón qu’aumente de preciu, Andecha Astur vien de presentar una riestra entrugues pa conocer les xides que motiven tala discriminación.

Les entrugues presentóles Jon Iñarritu, senador de EH Bildu –organización coalligada con Andecha Astur en Los Pueblos Deciden- y al traviés d’elles pretende determinase si esiste daqué xida que xustifique la discriminación que carecemos los asturianos al nun aplicase a l’autopista del Güerna los beneficios que tan aplicándose n’otres autopistes del Estáu, nes que s’elimina’l peaxe o s’amenorga’l mesmu, mentes n’El Güerna increméntase’l preciu.

Como ye persabío, l’espresidente español, Jose L. Rodríguez Zapatero, prometió acuyá nel 2008 la eliminación del peaxe d’El Güerna, lo que ye evidente que nun cumplió, ensin que’l “Principado” nin el PSOE n’Asturies pidiere desplicaciones. Lo mesmo podríemos dicir del PP, que tampoco nun fexo un res al respeutu mentes tuvo nel gobiernu d’España, ensin que’l “Principado” nin el PP n’Asturies gutiaren tampoco.

Esti sábadu 22 Andecha Astur cellebra en Noreña esti eventu nel que la República Asturiana, el municipalismu y les candidatures de xunidá popular, la mocedá, el feminismu y l'antifacismu sedrán los protagonistes conxugando la información y l’alderique abiertu

L'Alcuentru 18 tendrá llugar el sábadu 22 d'avientu en Noreña, y entamará a les 13 hores cola rialización d'un Murial Popular na cai El Fontán, y continuará de magar les 16 hores nel Llar d'Alcuentru de la Muyer cola charra "Doce xides pa la República Asturiana" a cargu del mayestru y escritor Mariano Suárez, continuando darréu col alderique "Mocedá, feminismu, antifacismu" na qu'intervendrán -ente otros-  representantes d'Ernai, organización de mocedá nacionaliega vasca. Darréu'l tema a tratar sedrá "Municipalismu y candidatures de xunidá popular",  cola participación de Conceyu Abiertu por Noreña.

L'Alcuentru finará con un conciertu a cargu de Músicos xuníos por Noreña, que tendrá llugar nel Prestosu, cafe-vintage.

L'Alcuentru18 ye un espaciu abiertu a la participación, dientru la dinámica d'Andecha Astur de facilitar l'alderique y la xunidá d'aicion dientru  la izquierda nacionaliega asturiana.