Foi la presión popular, continuada demientres décades, la que forció al tradicionalmente antiasturianu PSOE a dar un pasu alantre a favor de la oficialidá.

El decidíu apueste de la población asturiana pola so llingua ya'l  trabayu ensin descansu de les organizaciones que, como Andecha Astur, llucharon siempres por ella, llevó al partíu socialista a replantegase la so oposición frontal a la llingua y a incluyir, por pidición d’un ampliu seutor de los sos afiliaos, una enmienda llixeramente favoratible a la oficialidá, polo que nun podemos sinón felicitalos, y felicitamos.

Sicasí los términos nos que ta redautada la enmienda socialista pola oficialidá nun son tolo contundentes que prestaría, dexando abondo espaciu a estremaes interpretaciones y ambigüedaes, ensin afitar plazos nin concretar el so etereu deseyu de teórica oficialidá en dengún fechu concretu y colando amás nel testu l’inventu del gallegu asturianu, col qu’esti partíu quier francer la xunidá llingüística.

Per otru llau, nun dexa de ser paradóxica –y non falta d’hipocresía- la desixencia fecha al  PSOE  “dar yá pasos reales hacia la oficialidá del asturianu” dende  Podemos ya IX, partíos que de querer tendríen ya oficializada la llingua nos conceyos de la so xurisdición, afeutando al 70% de la población asturiano.

Andecha Astur apautase al actu d'homenaxe al exércitu asturianu que, una vuelta independizáu de la República española, llantó cara al exércitu facista español n'El Mazucu,

 

L'actu, entamáu por FAMYR Y  Ahaztuak 1936-1977, tendrá llugar esti sábadu 16 de setiembre de magar les 12 hores, nel Altu la Tornería, El Mazucu, Llanes, y nel mesmu homenaxearáse a Jon Paredes "Txiki", Ángeles Flórez "Maricuela" y Victor Luis Álvarez, tando prevista la presencia del diputáu d'Esquerra Republicana, Jon Tardá.

Andecha Astur considera perafayaizo homenaxear a los combatientes antifacistes del exércitu asturianu, nel que tamién participaren antifacistes vascos y de l'Asturies de Santillana, que llantaren cara al exércitu franquista y a la Llexón Condor, dando llugar a una de les batalles más heroiques de la nuesa hestoria, onde un l'exércitu asturianu, con alrodiu de 5.000 presones consiguió aparar a un exércitu facista qu'avanzaba victoriosu tres la rendición del gobiernu vascu y la falta de resistencia de Santander.

Arturu X. Bermeyu respuende a les declaraciones del cabezaleru del PSOE, Pedro Sánchez, falando de Galicia, Cataluña y País Vascu como naciones, escaeciendo Asturies,  “nesti casu la inorancia nun ye disculpa. El “nueu” PSOE de Pedro Sánchez ye’l de siempres, y pa ellos Asturies nun ye más qu’una “bonita provincia del norte”.

Nel mesmu sen, y respeutu a los plantegamientos de plurinacionalidá defendíos por Pedro Sánchez namás pa eses tres naciones del estáu, afirma que “la reconocencia de la Plurinacionalidá pol PSOE namás supón el postrer pasu p’afitar un Estáu que reconoza namás a lo que falsamente dieren en llamar “naciones hestóriques”, negando-y identidá y drechos a Asturies.”

 “La imposición dende Madrid del Estatutu d’Autonomía, del propiu “Principado” como istitución, ya inclusu’l nome del país que pasaren a denominar “Principado de Asturias” fo’l  primer pasu de la negación de la identidá asturiana, la negación non solo de la so hestoria, sinon del so futuru, y con esta obligada reconocencia de la “plurinacionalidá”, el PSOE quier afitar esta situación y asimilar definitivamente a Asturies, faciéndola práuticamente un barriu de Madrid”

Perimportante rempuesta popular a la convocatoria de Referendum símbólicu d'Andecha Astur.

¿El Pueblu Asturianu tien qu’exercer el Drechu a Decidir, y escoyer llibremente’l so futuru, determinando’l tipu de gobiernu y l’ordenamientu xurídicu-políticu d’Asturies? Esa foi la entruga plantegada nel referendum simbólicu cellebráu na Plaza la Catedral, nuna xornada especialmente illusionante na que quedó nidio que pesia la manipulación informativa y el llamentable comportamientu de los políticos del "Principado", los asturianos viven de cerca l'alderique sobro'l Drechu a Decicir, y quinxeren que se dieren unes condiciones democrátiques básiques que permitieren exercelu nel nuesu país.

Los actos d´esti 8 de setiembre -Díi de la Nación Asturiana- entamaron cola intervención de Llucía Fernández, que fexo un repasu a la situación d'Asturies anguañu, con un Estatutu y una istitución autonómica -el "Principado" - impuestos dende Madrid, ensin otru aquelli que llevar alantre les polítiques d'esfarrapamientu socio-económicucultural d'Asturies col oxetu d'asimilala a un proyeutu d'Estáu que tien al nuesu país práuticamente como un barriu de Madrid  y que ta llevándomos a una situación d’auténticu xenocidiu, con decenes de miles d’asturianos obligaos a emigrar añu ente añu, y con otres tantes decenes de miles resistiendo en condiciones de paru y precariedá llaboral y social.

La sentencia del Casu Riopedre dexa n’evidencia al es-presidente del “Principado”, cuya dimisión como responsable políticu ye obligada. Nun tien que facer más que lo que pide’l PSOE a otros partíos en casos asemeyaos de corrupción.

Asturianu / Español

La sentencia del Casu Riopedre, pesia imponer penes muncho menores de les pidíes pola acusación y el propiu “Principado”, determina nidiamente la culpabilidá del que demientres munchos años foi Conseyeru d’Educación del “Principado” baxo los gobiernos d’Areces, de quien siempres foi man drecha. Por ello ye evidente la responsabilidá política direuta del entós Presidente del “Principado” qu’agora, nel so puestu de Senador en Madrid, quier pasar desapercibíu ensin asumir les consecuencies de la so xestión.

Álvarez Areces tien qu’asumir les sos responsabilidaes polítiques y per ende dimitir darréu, que ye precisamente lo que pide’l PSOE que faigan los responsables políticos d'otros cargos públicos xulgaos por corrupción.