Tres los postreros datos de contaminación, y la incapacidá manifiesta de la Conseyera de Fomento, amestámosmos al pidimientu de dimisión inmediata de Belén Fernández

Dientru la reinal incompetencia y desenfotu d’un gobiernu sucursal, la Conseyera de Fomento del “Principado” non solo nun ye a controlar los niveles de contaminación que carecemos n’Asturies, sinon que continúa cola so política de ñegación de los fechos –otra vez lo de la “llienda urbana”-, y recurre a midíes tan inaceutables como entrampiar la medición de contaminación, nun dar datos en tiempu rial como ye obligatoriao (pa nun xenerar allarma social diz ella), desinformar, pretender culpabilizar a los ciudadanos de la contaminación –calefación, coches...- y a lo cabero esperar a que la lluvia faiga lo que debiere ser el so llabor, oxetivu que como vien de vese, tampoco nun s’algama.

Andecha Astur sofita la concentración convocada’l prósimu miércoles 25 xineru delantre la Xunta Xeneral

Mentes el gobiernu del “Principado” ñega lo evidente y reza pa que llueva y los partíos con representación istitucional son incapaces de facer propuestes útiles ye la sociedá asturiana la que se tien d’organizar pa defendese y denunciar la incompetencia de quien, teniendo la responsabilidá de controlar esa contaminación que carecemos n'Asturies, lo único que fain ye mirar al cielu.

Cuando un gobiernu en cuentes de facer respetar les normes medioambientales a les grandes empreses, potenciar el tresporte públicu –gratuitu y de calidá-, o da-y puxu a les enerxíes renovables, tien como rempuesta ñegar lo evidente, desinformar, esperar la lluvia como única solución, y pretender responsabilizar al ciudadanu pola contaminación que xeneren les calefaciones y los coches... la rempuesta de la sociedá ye imprescindible. Por eso Andecha Astur amiéstase a la convocatoria entamada pola Plataforma d’Afeutaos pola Contaminación d’Asturies, pal prósimu miércoles 25 xineru a les 11:45 hores delantre la Xunta Xeneral.

Manifestamientu pola llingua y l'autonomíaLa imposición va 35 años del Estatutu d’Autonomía y la figura del “Principado” dexó a Asturies indefensa frente al colonialismu español.

La istitución del “Principado” y l’Estautu d’Autonomía impuestos dende Madrid y qu’a los asturianos enxamás nun se mos permitió votar, supunxo non solo ñegar la Soberanía asturiana pa decidir llibremente’l so futuru, sinon tamién convertimos en ciudadanos de segunda nun Estáu qu’escontra la razón y la hestoria ñegó a Asturies el so drechu a formar parte de lo que llamaren “Nacionalidaes hestóriques”.

Mentes vascos, catalanes, andaluces, gallegos... pudieron pronunciase sobro’l so propiu estatutu, Asturies, la nación más antigua de lo qu’agora ye l’Estáu español y una de les más antigües d’Europa, quedó condergada a un “Principado” y un Estatutu impuestu que ñega la nuesa hestoria, la nuesa llingua, los nuesos drechos y que mos dexa indefensos frente al colonialismu español.

Nun ye namás Riopedre, Villa, Justo Rodríguez Braga... tol PSOE-SOMA-UGT ta enartáu nuna rede mafioso-clientelar financida cola xestión del esfarrapamientu del texíu socio-económicu asturianu.

Les detenciones y pasu pel xulgáu de Riopedre, Villa, y agora Justo Rguez Braga, asina como varios cargos municipales del PSOE; dende Campelo, es-alcalde de Llangréu, a Francisco Gzález, es-alcalde de Cuideiru, confirma les denuncies que vien faciendo Andecha Astur dende cuantayá de la esistencia d’una “trama asturiana” de corrupción y redes mafioso-clientelares entamaes dende’l PSOE y allegaos (SOMA-UGT) y con  collaboraores necesarios n’IU y CCOO.

Dende la mesma denuncia de la traxedia del Pozu Nicolasa, cola implicación de les direiciones sindicales de CCOO y SOMA, al PGOU llaniscu, El Musel, el Niemeyer, la Zalia... pasando pol esfarrapamientu de los seutores productivos asturianos al traviés del financiamientu sindical y l’enriquecimientu de los sos cabezaleros, como ye’l casu de Villa, la “fiesta” de los fondos mineros, o la implacable rede clientelar alrodiu les sovenciones y la contratación d’obres y presonal nos Ayuntamientos, Andecha Astur vien denunciando reiteradamente la esistencia d’una trama asturiana de corrupción encontiada básicamente na xestión del esfarrapamientu del texíu socio-económicu asturianu.

Belén Fernández, Conseyera de Fomentu del "Principado"Decir que namás hai contaminación n’Avilés y Trubia ye faltar a la verdá, por inorancia o pa engañar.

Les recientes declaraciones de la Conseyera de Fomentu, Belén Fernández, minimizando la contaminación que carecemos n’Asturies y afirmando que, sacántenes Avilés y Trubia, tamos meyor qu’en Madrid, suponen qu’o bien ye tan inorante que nun conoz los resultaos de les estaciones de control de Madrid y les d’Asturies, -nin ensiquiera a propia ueb del gobiernu del “Principado”- o bien ta mintiendo a sabiendes col únicu oxetu de “tranquilizar” a la sociedá asturiana.

Como bien desplica la Coordinadora Ecoloxista d’Asturies, venimos careciendo nos postreros años los piores valores de tol Estáu, especialmente no que cinca a los valores del cancaníxenu bencenu, que multipliquen los valores encamentaos pola OMS tolos díis, ensin que’l “Principado·faiga un res.

DATOS APURRÍOS POLA COORDINADORA ECOLOXISTA D’ASTURIES