Andecha Astur sofita la convocatoria fecha pola Xunta la Defensa la Llingua Asturiana pa desixir la Oficialidá de la llingua nacional d’Asturies

Andecha Astur ye l’únicu partíu qu’hestoricamente, dende l’entamu ya ensin dubies nin arrodios defende la llingua asturiana tanto a nivel revindicativu como de fechu, siendo los únicos que presentamos les papeletes pa les elleiciones na nuesa llingua –ganando nel Tribunal Costitucional el podre exercer esi drechu-, por más qu’en munches ocasiones –como foi nes pasaes elleiciones nacionales- ello supunxera la retirada de les nueses papeletes,  polo que ta nidio que sofitamos el manifestamientu convocáu pal 21 d’abril en defensa de la llingua nacional, asina comu’l viniente que coincidirá col Díi les Lletres.

Afalamos a tola población asturiana a acudir al manifestamientu que se cellebrará n’Uviéu el prósimu sábadu 21 d’abril pa desixir el reconocimientu llegal de los drechos llingüísticos de los asturianos y afalamos igualmente a tolos partíos políticos y asociaciones que participarán na convocatoria a pasar del posturéu a la aición, concretamente a nivel de Conceyu, onde en cuentes d'aprebar "proposiciones de apoyo" que nun van a dengún llau ye preciso aprebar Ordenances que garanticen los drechos llingüísticos de los vecinos; arriendes d'emplegar l’asturianu nes sos comunicaciones y poniendo los medios al so algame pa que la Oficialidá seya un fechu.

Llucía Fernández, en nome d’Andecha Muyer, felicita a les decenes de miles d’asturianes que salieron ayeri a pelear polos sos drechos. Desixendo qu’esto nun quede nun xestu ensin más y se torne en midíes concretes pa finar coles desigualdaes.

"Respigaba. Nun hai otra pallabra. Dicen que yéremos ventimil, nun se calcular, nun se ve lo grande’l sol dende dientro. Se namás que les casi de Xixón tremaben de rabia y d’arguyu; de rabia polo qu’aguantamos tolos díis, d’arguyu porque ayeri amosamos, les muyeres, que somos quien a facemos ver, a glayar, a organizamos, a convocar la que foi con diferencia la manifestación asturiana más multitudinaria de los años caberos. Asturies entera volcada na reclamación de los drechos pa toos por igual, nun estáu, España, nel que’l facismu dexó una heriencia heteropatriarcal y misóxina que xustifica y consiente’l terrorismu machista.

Primero nes places de los Conceyos y lluéu en Xixón, muyeres, neñes, moces, güeles, homes y neños, xuntes y xuntos nuna lleción de dignidá y capacidá de rempuesta que marca’l camín pa otres lluches sociales.

Dende Andecha Muyer queremos denunciar nesti díi que la violencia machista ye námás la pica visible d’una complexa trama d’opresión faza les muyeres, específicamente planificada pa sacar el másimu beneficiu al so papel social como productores, curiadores, oxetos d’usu sesual y reproductores, al tiempu que mos anula como presones,  torgándomos per tolos medios la participación social y política, privando a cualisquier llucha social de bona parte del puxu de más del 50% de la población.

Namás espero que esti díi pase a la hestoria ensin que naide (partíu, sindicatu, collor) quiera apuntase un méritu que ye esclusivu de les muyeres y que les voces na cai, les pallabres guapes y les declaraciones a la prensa nun queden no de siempre: posturéu y semeya pa la galería".

La llectura de los sos poemes al llau de la tumba del hestoricu nacionaliegu dieron especial emotividá a un actu nel que Paulo Arboleya faló d'organización y futuru.

VER SEMEYES

La cita añal del nacionalismu asturianu homenaxeando a Andrés Solar, presonaxe de reconocíu prestixu lliterariu del que polo xeneral suel tapecese'l so fondu compromisu nacionaliegu, collaboraor nel aniciu del Ensame Nacionalista Astur y compañeru de partíu de munchos de los qu'agora formen parte d'Andecha Astur.

Esti añu l'actu entamó cola llectura de dellos de los sos poemes por neños, tres lo cual, y yá delantre la placa llantada por Andecha Astur a la puerte'l cimenteriu, yá en 2004, procedióse a remembrar la figura d'esti hestóricu nacionaliegu faciendo delles considerances sobro la so hestoria de llucha y compromisu, pa siguir cola intervención de Paulo Arboleya que de magar la figura d'Andrés Solar fexo un respasu a la rialidá d'anguañu, con especial mención a los que quinxeron ver en "sucursalismos progres" una alternativa pal nuesu país, y de los que dixo, espera qu'una vegada comprebao la inutilidá de la so sumisión a los mandatos de Madrid, asuman la so responsabilidá pa con Asturies y la necesidá d'articular alternatives polítiques asturianes dafechu. "Yá ta bien de sumisión por sacar una conceyalía qu'a la fin nun va a dengún llau".

A pocu más d’un añu de les elleiciones nacionales, de conceyu y probablemente tamién europees, Andecha Astur convoca’l Conceyu Nacional #YeAsturies, col enfotu d’afitar llnies d’actuación que mos permitan aportar a esa convocatoria elleutoral coles coses bien feches, coles idegues clares, con xunidá y con ganes.

La convocatoria rialízase dende’l comencimientu de que ye urxente treslledar al Pueblu Asturianu la convición de que les soluciones p’Asturies van venir d’Asturies y non de fuera, asina como de la necesidá de faer frente común a la hora d’encarar les consecuencies de la política española p’Asturies: despoblación, emigración forciao, desdexamientu dela fastera rural, desproteición del campu, masificación turístico, escalamientu de la industria, precariedá llaboral, desaniciu cultural, contaminación, probitú, represión llingüística... y un llargu ecétera que define la triesti situación que vive’l país.

Poro, dende Andecha Astur convocamos a tola xente que quiera trabayar por Asturies y que quiera sacar alantre esti pueblu, a acudir al prósimu Conceyu Nacional que, convocáu baxo’l llema #YeAsturies, cellebraremos a finales del mes de mayu.

En prósimes feches dirán convocándose aconceyamientos abiertos n’estremaos puntos de la xeografía asturiana pa dir tresnando esti Conceyu Nacional, de los que diremos informando al traviés d’esta páxina. El primeru d’ellos tendrá llugar güei mesmo en Siero, a les 20:30 hores nes Escueles de Granda, y ta abiertu a miembros de la organización y simpatizantes en xeneral.

Esti sábadu 30 d'avientu, Andecha Astur homenaxeará a Andrés Solar, reivindicando la so figura como presona y como nacionaliegu asturianu.

A les 13 hores, y nel Cimenteriu de Deva –Xixón-, Andecha Astur reivindicará un añu más la dimensión nacionaliega d’Andrés Solar Santurio, escritor de merecíu y reconocíu prestixu nel ámbetu lliterariu asturianu del que suel tapecese’l so fondu compromisu políticu que lu llevó a ser miembru fundaor del Ensame Nacionalista Astur, presentándose por esi partíu como candidatu a la Xunta Xeneral, y siendo en tou momentu un referente pola so implicación, capacidá de trabayu y cualidaes presonales.

D’elli ye la conocía poesía:

 “Prúyemos un pueblu llibre/ que nome cola so voz / los sos collacios y el pan. / Prúyemos un pueblu llibre / y una Asturies dixebrá.

Que tan bien espeya’l sentir y los enfotos del nacionalismu asturianu.