Andecha Astur amuesa la so solidaridá pa cola xente y colleutivos que lleven trabayando dende va unos años nel Mataeru de La Pola Sieru nos momentos d’incertidume que se tan viviendo acerca de la continuidá d’esti espaciu públicu

ANDECHA SIERU.- Queremos amosar la nuesa sospresa al ver como L’ayuntamientu ta aprofitando una avería llétrica pa desagospiar un espaciu que ye del pueblu, declarando en ruina un edificiu que nun tien más qu’una avería llétrica, con fines netamente especulativos. Pa nós ta nidio que’l declarar en ruina d’un díi pa otru un edificiu, ensin informe téunicu nin otru documentu que lo avale,  nun ye sinón un casu d’especulación urbanístico qu’utiliza esta maniobra pa desagospiar un espaciu hestóricu y del pueblu que va pasar por baltiar esti edificiu.

Nun podemos escaecer que tamos falando d’un edificiu hestóricu de La Pola, resclavu d’un tiempu en que l’actividá ganaera permitía cuntar con un mataeru públicu municipal, colo que el so esbarrumbe sedría un ataque al padrimoniu y a la hestoria del conceyu, de la fastera y del país: una bones finaron con campu y la ganadería, quieren finar agora cola hestoria mesma.

Poro, desiximos al ayuntamientu que recule nes sos intenciones y lu devuelva a la xente pa que pueda caltener esti edificiu y continuar esfrutándolu, d’una forma autoxestionada ya ensin la inxerencia nin del ayuntamientu nin d’otru tipu d’istituciones.

"Ye mui guapo encamentar al Gobiernu y a la Xunta Xeneral una reforma del Estatutu pa declarar la oficialidá, pero ¿por qué Mieres nun sigue l'exemplu de Bimenes y se declara la Oficialidá? o polo menos unes Ordenances de Conceyu que reconozan los drechos llingüísticos de los mierenses, como en Noreña. Al rodiu la Oficialidá hai munchu posturéu y poco compromisu"

Lola Suárez, cabezalera de la Estaya de Llingua y Cultura Asturiana d'Andecha Astur valoró positivamente encamentar al Gobiernu y a la Xunta Xeneral una reforma del Estatutu pa declarar la oficialidá, pero criticó la falta de compromisu del Conceyu Mieres onde la composición de la Corporación de Conceyu permitiríe una declaración d'Oficialidá semeyante a la de Bimenes y l'aprebación d'unes Ordenances de Conceyu que reconozan los drechos llingüisticos de los vecinos.

"Na práutica totalidá de los Conceyos onde hai mayoría de conceyales de formaciones polítiques teóricamente respetuoses colos drechos llingüísticos de los vecinos, Podemos, IU y Foro principalmente, nun tan faciendo un res pola oficialidá de la llingua asturiana y estrémense perpoco de lo que fain los Conceyos con mayoría del PP, PSOE, enemigos declaraos del asturianu"

Andecha Astur vien de presentar una riestra d’entrugues empobinaes a esclariar l’orixe del carbón qu’apaez na sablera de San Llorienzu.

Les entrugues presentóles Jon Iñarritu, senador de EH Bildu –organización coalligada con Andecha Astur en Los Pueblos Deciden- y al traviés d’elles pretende determinase cual ye l’orixe del carbón que ca pocu vien apaeciendo na sablera de San Llorienzu de magar el fundimientu del Castillo de Salas, y que nos tiempos caberos vien atribuyéndose tamién a la descarga de carbón nel puertu d’El Musel , ya inclusu al parque carbones.

Trenta y dos años dempués del embarrancamientu del Castillo de Salas, y por muncho que la corporación municipal d’entós (PSOE, con Areces d’alcalde) quinxere quita-y importancia a les consecuencies de la mala xestión que prevocó el vertíu de tonelaes de carbón a la mar, lo cierto ye que sigue apaeciendo periódicamente contaminada la sablera con carbón.

Andecha Astur desixe un repartu xustu de la Renta Social y la toma de midíes que finen cola situación precaria de miles de xixoneses

El despropósitu de repartir la renta social en función de la velocidá a la hora de presentar la documentación, anunciando d’antemán que la dotación total algamará escasamente p'asegurar los drechos d’unos 300 ciudadanos y cuando'l primer díi multiplicóse yá esa cifra por diez, convierte lo que yera una aniciativa exemplar nuna tomadura de pelu a los que pior lo tan pasando.

Dende Andecha Astur reconocemos que gracies a la Renta Social munches families xixoneses pudieron caltener l’añu pasáu un nivel de vida pasaeru, permitiéndo-yos pagar cuestiones tan básiques comu ropa y calzao, gafes, lletrodomésticos o un dentista. Somos coscientes de que tenía erros, comu cualisquier cosa que tea entamando, y por supuestu yera meyorable, pero'l so mayor fallu fo'l de nun algamar a cubrir les necesidaes de tolos que la solicitaren, más por escesu de necesidá que por falta de dotación.

“Nun val namás con facer declaraciones oficiales favorables a la Oficialidá, hai que concretales llegalmente ellí onde se tien capacidá pa ello”.

Tres el plenu del pasáu xueves 9/11/2017 nel que l’Ayuntamientu Xixón aprebó una declaración respaldando la oficialidá del asturianu y pidiendo la reforma del Estatutu pa incluyila, Andecha Astur vien de presentar en dichu ayuntamientu una propuesta d’unes Ordenances Municipales d’Oficialidá, que dean conteníu rial a esa voluntá de normalización democrática en materia llingüístico que supón la oficialidá de la llingua d’Asturies, faciéndola efetutiva polo menos nel conceyu Xixón; entamando asina un procesu nel que d'esistir la voluntá que se presumee nes declaraciones feches dende Podemos, IU y Foro, podríemos dir avanzando polo menos a nivel de conceyu mentes llega la reforma estatutaria que recueya la oficialidá.

Lola S. Vallina desplicó que la reconocencia de los drechos llingüísticos de los vecinos de Xixón a nivel de Conceyu nun sustitúi la necesaria oficialidá de la llingua a nivel nacional, pero supondríe un perimportante avance, con efeutos práuticos inmediatos, munchu más eficaz que “declaraciones ensin plazos nin compromisos que fasta agora va quedando en puru posturéu ensin repercusión práutica”.