"Ye mui guapo encamentar al Gobiernu y a la Xunta Xeneral una reforma del Estatutu pa declarar la oficialidá, pero ¿por qué Mieres nun sigue l'exemplu de Bimenes y se declara la Oficialidá? o polo menos unes Ordenances de Conceyu que reconozan los drechos llingüísticos de los mierenses, como en Noreña. Al rodiu la Oficialidá hai munchu posturéu y poco compromisu"

Lola Suárez, cabezalera de la Estaya de Llingua y Cultura Asturiana d'Andecha Astur valoró positivamente encamentar al Gobiernu y a la Xunta Xeneral una reforma del Estatutu pa declarar la oficialidá, pero criticó la falta de compromisu del Conceyu Mieres onde la composición de la Corporación de Conceyu permitiríe una declaración d'Oficialidá semeyante a la de Bimenes y l'aprebación d'unes Ordenances de Conceyu que reconozan los drechos llingüisticos de los vecinos.

"Na práutica totalidá de los Conceyos onde hai mayoría de conceyales de formaciones polítiques teóricamente respetuoses colos drechos llingüísticos de los vecinos, Podemos, IU y Foro principalmente, nun tan faciendo un res pola oficialidá de la llingua asturiana y estrémense perpoco de lo que fain los Conceyos con mayoría del PP, PSOE, enemigos declaraos del asturianu"

Asina mesmo declaró que "El casu más notable ye'l d'IU, que de tener caltenío'l so compromisu cola oficialidá y condicionar a ella'l sofitu al PSOE nel "Principado", agora mesmo yá tendríemos algamao la reconocencia de los drechos llingüísticos de los asturianos cola declaración de la Oficialidá de la nuesa llingua; pero prefirío renunciar a ello y negociar puestinos, faciéndose cómpliz de la represión llingüística y la galleguización del ocidente asturianu que practica'l PSOE dende'l "Principado"