Una nuea amuesa de l'asturfobia que domeña les actuaciones del Ayuntamientu de Xixón, en concreto, y del  “Principado” en xeneral.

Andecha Xixón.- Depués d’aguantar feries d’abriles, procesiones de Selmana Santa, cellebraciones fuboleres, reggeatones, villancicos al altu la lleva y milenta atentaos acústicos y culturales más, una banda gaites toca nuna espicha, de  tardi, nun llugar afayaízu pa ello –La Plaza’l Llavaeru, en Cimavilla- y ensin estorbar el tráficu. La policía multa a los gaiteros y obliga a retirar les pipes de sidre. El mensaxe rescampla: si ye asturiano, estorbayos.

El fechu de qu'al díi viniente –güei- tuviere convocada una concentración non silenciosa por parte de la mesma Banda Gaites multada –Villa de Xixón- fai albidrar qu'a l'asturfobia vien a amestase una peculiar rabia a aquellos que tienen l’enfotu de defender los sos drechos, y con ellos los de tolos asturianos.

Qu’aneciemos en ser nós, duel-yos. Que toquemos la gaita, que falemos la nuesa llingua, que bebamos sidre, que seyamos país, duel-yos. Pero duel-yos más cuando nun mos conformamos col ámbetu folclóricu, aptu pal turismu, y reclamamos lo de nueso.

Énte la cantidá solicitada polos propietarios del Hotel Kaype en compensación pola anulación de llicencies que motivó’l derribu del complexu, y que podríe sobropasar los 19 millones d’euros, Andecha Astur desixe que l’Ayuntamientu Llanes tome les midíes afayaíces pa que seyan los responsables de la concesión d’esa llicencia inregular los que respuendan económica y llegalmente.

Pretender que los llaniscos tean que responder económicamente poles consecuencies de la concesión una llicencia municipal d’agrupación de finques sobro les que se llevantó l’ampliación del hotel en primer llinia de playa, anulada dempués pol TSXA, resulta inaceutable dafechu.

La entós alcaldesa, Dolores Álvarez,  y José Herrero (diputada rexonal pol PSOE y secretariu xeneral del PSOE llaniscu respeutivamente anguañu), xunto con otros posibles responsables son los que tienen d’asumir, non solo política, sinon económica y llegalmente les consecuencies de les sos actuaciones nesti casu, direutamente rellacionáu col procesu especulativu, de masificación turística y de política del “pelotazu” entamáu pol PSOE nesti conceyu, que tuvo la másima espresión nel Plan Xeneral d’Ordenamientu Urbanu qu’afortunadamente Andecha Astur foi quien a anular nos tirbunales.

Andecha Astur llama a participar nel manifestamientu escontra la tortura pública d’animales entamáu por Anadel, y na recoyía robles escontra les clases de toréu entamaes esti añu.

Dende la refuga dafechu al maltratu animal, ainda más cuando se convierte n’espeutáculu y pretende amarutase como arte, y la denuncia de la collaboración indispensable del Ayuntamientu Xixón pal so caltenimientu, Andecha Astur llama a la sociedá asturiano a manifestase esti domingu 12 d’agostu a les 16:30 h. na Plazuela San Miguel -Xixón-.

Arriendes d’ello, y énte la convocatoria de clases de toréu pa neños, llama a participar na recoyía de robles pa, como se fexo en 2014 impedir que puea enseñase a los neños a esfrutar del dolor animal, remembrando que’l Comité de los Drechos del Neñu y la Organización de les Naciones Xuníes, pronúnciense de forma espreso escontra que la reciella participe y asista a eventos taurinos.

Arriendes d’ello Andecha Astur quier denunciar que la tortura y muerte de toros convertía n’espeutáculu públicu va escontra la sensibilidá y la cultura asturiana, y el so caltenimientu n’Asturies nun tien otru enfotu que perafitar una espresión de lo “español” nel nuesu país, una forma xabaz d’aculturización y españolización ensin xacíu.