Dende Andecha Astur facemos un llamamientu al Pueblu Asturianu a dir a Bimenes esti sábadu, 9 de xunu, y participar na XXII fiesta de la Oficialidá de Bimenes

Mientres l’alderique sobro la Oficialidá ta más encerriscáu que nunca, con postures estremes enfrentaes y ataques a los drechos llingüísticos que rocen l’esperpentu, al tiempu que la indefinición de los partíos con braeru poder pa declarar la Oficialidá tiénenmos dando vueltes en reondo pente declaraciones valeres y contradiciones internes, más de dos décades d’Oficialidá en Bimenes son la preba apalpable de que non solo ye posible, sinón positivo.

Toles presiones carecies nun foron abondo pa que’l Conceyu Bimenes reculare, se rindiere o se conformare con medies tintes. Exemplu de coherencia y referencia obligao nel avance na reconocencia de los drechos llingüísticos del Pueblu Asturianu, Bimenes marca un camín a siguir: Oficialidá, de pallabra y de fechu, ye l’únicu camín aceutable.

Andecha Astur vien de remembrar al Ayuntamientu d’Uviéu'l so fallu por omisión na aplicación de la llei de Memoria Hestórica al non retirar el nome de Sabino Fernández Campo a la cai, parque infantil y estatua a nome d’esti presonaxe, desixendo que se tomen darréu les medies oportunes pa camudar esti fechu.

Sabino Fernández Campo  ye reconocíu falanxista y presuntu asesín de multitú de conciudadanos del conceyu d’Ayer, tando tamién venceyáu, según otres fontes, al espoliu del padrimoniu hestóricu-artísticu del Duque d’Hernani, espoliu fechu a favor de Ca’l Rei.

Consideramos el nuesu deber ser valedores de la memoria de tolos ayeranos y republicanos españoles que foron pasaos poles armes, desixendo que se camuden darréu tolos homenaxes públicos qu’en forma de cai, parque y escultura se caltienen col nome de Sabino Fernández Campo.

Con estes pallabres Miguel Ánxelu Agudo, representante d’Andecha Astur n’Uviéu calificó la decisión del Ayuntamientu d’Uviéu, con Somos ya IU nel gobiernu xunto col PSOE, de caltener la subvención a la Fundación Princesa, entamaora de los Premios Princesa de Asturias.

Pa Miguel Ánxelu, que vaigan a manifestase en La Escandalera escontra los Premios Princesa, los mesmos que-yos apurren perres de tolos uvieínos a la fundación que los organiza, supón tou un exerciciu d’hipocresía qu’espeya perfechamente cuala ye la “nueva política” que se fai n’Uviéu: “más de lo­ mesmo, con un pocu de posturéu pa la galería”.

La concesión d’una sovención de 250.000 € a la Fundación Princesa de Asturias, -un 16% menos que la concedía l’añu pasáu- supón pa Miguel Ánxelu la demostración de qu’a la hora de la verdá n’Uviéu siguen les coses igual que colos gobiernos del PP. “N’Uviéu tamos esperando pol cambiu prometíu, y namás vemos xestos publicitarios ensin conteníos reales”.

La renuncia de la Dellegación del Gobiernu español n'Asturies  a recurrir les ordenances d'oficialidá del conceyu supón un avance nel procesu d'Oficialidá de la llingua asturiana a nivel nacional.

La ordenanza municipal del asturianu, aprebada en Noreña a propuesta de Conceyu Abiertu, entra yá en vigor tres cumplir tolos trámites llegales, una vuelta que la Dellegación del Gobiernu español n'Asturies, que nel so momentu reclamare l'anulación de la ordenanza, renunció a exercer esi llabor represivu.

Ye la primer vegada que dicha Dellegación nun recurre una ordenanza d'oficialidá n'Asturies, y supón un puntu d'inflexón na dinámica de represión llingüística que carecemos n'Asturies, reconociendo asina la so incapacidá pa torgar un procesu de reivindicación y recuperación llingüística socialmente imparable.

 

Una nuea amuesa de l'asturfobia que domeña les actuaciones del Ayuntamientu de Xixón, en concreto, y del  “Principado” en xeneral.

Andecha Xixón.- Depués d’aguantar feries d’abriles, procesiones de Selmana Santa, cellebraciones fuboleres, reggeatones, villancicos al altu la lleva y milenta atentaos acústicos y culturales más, una banda gaites toca nuna espicha, de  tardi, nun llugar afayaízu pa ello –La Plaza’l Llavaeru, en Cimavilla- y ensin estorbar el tráficu. La policía multa a los gaiteros y obliga a retirar les pipes de sidre. El mensaxe rescampla: si ye asturiano, estorbayos.

El fechu de qu'al díi viniente –güei- tuviere convocada una concentración non silenciosa por parte de la mesma Banda Gaites multada –Villa de Xixón- fai albidrar qu'a l'asturfobia vien a amestase una peculiar rabia a aquellos que tienen l’enfotu de defender los sos drechos, y con ellos los de tolos asturianos.

Qu’aneciemos en ser nós, duel-yos. Que toquemos la gaita, que falemos la nuesa llingua, que bebamos sidre, que seyamos país, duel-yos. Pero duel-yos más cuando nun mos conformamos col ámbetu folclóricu, aptu pal turismu, y reclamamos lo de nueso.