Na xornada d’ayeri, los dellegaos de Sortu, Pernando Barrena y Niko Moreno aconceyaron con Andecha Astur nel llocal de Xixón.

L’aconceyamientu enártase dientru los contautos esistentes ente les formaciones que componemos la coalición europea “Los Pueblos Deciden” con vistes a valorar la xera desendolcada pol nuesu eurodiputáu nesta llexislatura y a tresnar una estratexa común cara a les prósimes elleiciones europees, de magar  la bona esperiencia d’estos postreros cinco años.

Asina mesmo tamién se valoró la posibilidá d’incorporación de nueves formaciones soberanistes dientru la candidatura –de los paises catalanes, sobro too- col finxu d’aumentar la nuesa representación nel Parllamentu Européu, nun procesu que tendrá que dir definiéndose nos meses vinientes.

Tamién se comentó la posibilidá de daqué forma d’alternativa xunitaria a nivel estatal, conforme a los comentarios rializaos va pocu por Otegi a un mediu de comunicación, na llinia de lo que yá mos alantrara’l diputáu Oskar Mature nel pasáu aconceyamientu n'Asturies, y la forma en qu’esto podríe llevase a efeutu visto’l procesu involucionista del Estáu español en cuantes a la reconocencia y el respetu de llibertaes y drechos nacionales, y la necesidá d'entamar Procesos Costituyentes nes nueses respeutives naciones.

Na xornada d’ayeri aconceyemos con Oskar Matute, diputáu d’EH Bildu nel Congresu español, nel llocal d’Andecha Astur d’Uviéu.

La situación política nos nuesos respeutivos países, un repasu a l’actualidá a nivel estatal y l’avance de lo que pue ser la estratexa pa les prósimes elleiciones europees y mesmamente estatales foron los conteníos d’esti alcuentru nel que se compartieron valoraciones y apuntáronse propuestes de cara a una estratexa común nes prósimes cites elleutorales..

EH Bildu comparte coalición elleutoral con Andecha Astur en “Los Pueblos Deciden”, con presencia d’un eurodiputáu nel parllamentu européu. Frutu d’esta representación pudiemos llevar a Bruxeles temes como la contaminación n’Asturies, la situación de la llingua asturiana, la desindustrialización... y facer al so traviés les entrugues afayaíces que mos permiten conocer aspeutos de les polítiques europees qu’afeuten de forma direuto al nuesu país.

Los conceyos calteníos polos nuesos representantes na so visita al Parllamentu Européu amuesen el camín a siguir p’avanzar na totalidá de les cuestiones trataes.

Tres d’una intensa selmana de conceyos, alderiques y alcuentros, la dellegación d’Andecha desplazada a Bruseles pa tratar dellos temes col nuesu  eurodiputáu de Los Pueblos Deciden, Josu Juaristi y coles comisiones europees correspondientes, torna del Parllamentu Européu col comencimientu de tener fecho bonos avances y, lo que ye más importante, de tener nidio los vinientes pasos a dar.

Los principales temes trataos son el problema de la Contaminación del aire d’orixen industrial, la oficialidá de la Llingua asturiana y la pidición de la intervención de la OLAF nel marafundiu de los fondos mineros. Amás, al coincidir con una representación de los perxudicaos  pol escape de mercuriu d’AZSA, Andecha Astur aprofitó pa ufri-yos el so sofitu en tolo que precisaren y pa dar la robla del nuesu eurodiputáu na cuestión plantegada al parllamentu européu pola so indefensión mélica.

De magar la información apurrío por Andecha Astur a la Comisión Europea, esta pidi deplicaciones a España pola contaminación ambiental na fastera central d’Asturies

Los conceyos cola Comisión Europea entamen a frutiar y la Comisión europea del mediu ambiente cumple col so alcuerdu, algamáu nel conceyu que caltuvo Llucía F. Marqués en nome d’Andecha Astur con Roel HOENDERS (Oficial européu de política  de Calidá del aire y emisiones industriales) y Michael KLINKENBERG  (Oficial européu de proyeutu científicu / téunicu) nel que se comprometieron a abordar col gobiernu estatal l’incumplimientu de les normatives comunitaries na industria asturiana.

La información apurrío nesi conceyu apaez nel informe  de la Comisión Europea, incluyendo con ello al cientru d’Asturies y a Xixón pente les fasteres del Estáu español nos que s’incumplen les llendes de la Direutiva de Calidá del Aire no que cinca al diósidu de Carbonu (NO2) y a les partícules contaminantes, (PM10).

Les autoridaes comunitaries pidirán desplicaciones énte estos incumplimientos, tando convocada yá una xunta con representantes de los países afeutaos. El Ministeriu español cuenta apurrir nesi conceyu los datos del caberu informe disponible, del 2.016, llixeramente más bonibles que los del añu anterior y bultablemente meyores que les que se recoyeron nel añu 2.017, ello ye, esconderán les mediciones más recientes y les más escandaloses, que yá tan en manes de los comisionaos –tres de la nuesa visita- y disponibles nes sos páxines uebs.

Pediráse la intervención de la OLAF na cuestion del marafundiu de los Fondos Mineros, el so usu pa pagar servicios a sindicaleros que collaboraron col preslle de les mines, y guetará víes pa la intervención europea na contaminación ambiental que carez el nuesu país.

Les actividaes de la dellegación asturiana a Bruseles, rializaes en collaboración cola representación nel Parllamentu Européu de la coalición Los Pueblos Deciden de la qu’Andecha Astur forma parte dende un entamu, incluirán aconceyamientos con comisionaos del parllamentu européu y espertos nes materies a tratar, informando sobro la situación n’Asturies y estudiando formes d’intervención europea.

Ente otres ta previsto un aconceyamientu colos comisionaos europeos Roel Hoenders y Michael Klinkeberg, nel que pondráse enriba la mesa'l problema de la contaminación atmosférica n’Asturies, señalando a los principales culpables direutos y al gobiernu del “Principado” como responsables indireutos por omisión de la obligación de control. D’esti aconceyamientu espérses salir con propuestes concretes d’actuación que permitan presionar a les empreses más contaminantes y forciar al “Principado” a cumplir col so llabor, poniendo fin a les emisiones contaminantes illegales,  deteniendo si ye preciso la produción nes plantes industriales demientres nun pongan los medios afayaízos pa finar coles emisiones.