Na xornada d’ayeri aconceyemos con Oskar Matute, diputáu d’EH Bildu nel Congresu español, nel llocal d’Andecha Astur d’Uviéu.

La situación política nos nuesos respeutivos países, un repasu a l’actualidá a nivel estatal y l’avance de lo que pue ser la estratexa pa les prósimes elleiciones europees y mesmamente estatales foron los conteníos d’esti alcuentru nel que se compartieron valoraciones y apuntáronse propuestes de cara a una estratexa común nes prósimes cites elleutorales..

EH Bildu comparte coalición elleutoral con Andecha Astur en “Los Pueblos Deciden”, con presencia d’un eurodiputáu nel parllamentu européu. Frutu d’esta representación pudiemos llevar a Bruxeles temes como la contaminación n’Asturies, la situación de la llingua asturiana, la desindustrialización... y facer al so traviés les entrugues afayaíces que mos permiten conocer aspeutos de les polítiques europees qu’afeuten de forma direuto al nuesu país.

L’aconceyamientu, que resultó especialmente interesante, permitió conocer de primera man la rialidá d’Euskal Herría y la situación nel Parllamentu español, y estudiar les posibilidaes de que les formaciones que defendemos l’esaniciu del Reinu d’España y l’apertura de Procesos Costituyentes nes nueses respeutives naciones podamos tener una mayor capacidá d’incidencia nesi parllamentu pa responder a les sos polítiques involucionistes no nacional y social.