Una dellegación d’Andecha Astur afáyase en Cornualles calteniendo contautos col partíu nacionaliegu d’izquierda Mebyon Kernow.

Dientru la xera de rellaciones internacionales, Andecha Astur desplazó una dellegación a Cornualles respondiendo a una invitación de la organización política Mebyon Kernow (fíos de Cornualles), al traviés del so diputáu nel parllamentu córnicu, Andrew Long, ún de los doce representantes d’esti partíu nel mencionáu parllamentu que cunta con 123 escaños.

Mebyon Kernow forma parte de l’Allianza Llibre Europea, cola que la coallición europea na que s’afaya Andecha Astur, Los Pueblos Deciden, guarda una estrecha rellación. Arriendes d’ello caltién una importante allianza colos nacionaliegos escoceses y galeses.

Esti añu preséntense a les elleiciones con un programa comprometíu cola identidá nacional córnica y con un fondu compromisu social. Nesi sen, ye de solliñar que sofiten al restu d’identidaes nacionales dientru la Gran Bretaña, como Gales, Man y Escocia, y defenden el caltenimientu de los fondos sociales de 4 millones d’euros qu’agora apelligren pol brexit y que tan enfotaos en que los cubra’l gobiernu británicu.

Anque’l postrer falante de córnicu morrió a finales del sieglu XVIII, anguañu hai un fuerte movimientu pola so recuperanza: tien consideranza oficial, tola toponimia ta en billingüe, y cunta con escolarización parcial en córnicu, asina como radio y TV en córnicu dafechu.