Andecha Astur quier sofitar públicamente la convocatoria d’un referendum nel que’l pueblu catalán pueda votar si  quier o non costituyise nun Estáu propiu.

El que los pueblos puedan decidir llibremente’l so futuru ye un drechu básicu de toles naciones del mundiu, reconocíu ente otres na Declaración de Drechos Humanos y de los Pueblos, un drechu qu’Andecha Astur siempres desixó pal pueblu asturianu y qu’agora, cuando’l gobiernu catalán quier faer usu d’elli, sofita de toes toes.

Nel mesmu sen, consideramos antidemocrátticu comportamientu del gobiernu español negándose a negociar un referendum pautáu y vinculante, talo que los que vienen rializándose en Quebec o Escocia, y denunciamos la escalada represiva cola que menacia y que yá ta exerciendo, polo que quier faer público la so solidaridá col pueblu catalán y coles fuercies polítiques yas isituciones catalanes que tan siendo atacaes y menaciaes pol gobiernu de Rajoy.

Andecha Astur ye percosciente de que ca pueblu tien les sos rialidaes y los sos ritmos, pero comprométese a trabayar nesti nueu escenariu políticu que s’abre nel Estáu, faciendo por que Asturies nun quede na rezaga a la hora de superar el marcu autonómicu impuestu que carecemos, y  algame un estatus políticu encontiáu nel exercidiu de la Soberanía que mos correspuende como pueblu y que permita a los asturianos y asturianes decidir llibremente’l so futuru.