Confírmase la denuncia d’Andecha Astur de que nun esisiten proyeutos pa qu’Asturies se beneficie de los 1.000 millones d’euros d’aídes del programa européu “Coneutar Europa”.

Dempués d’una llarga campaña mediática na que s’afirmaba qu’Asturies diba ver iguaes munches de les sos carencies en materia de comunicación con Europa y que, por exemplu, proyeutos como l’autopista’l mar Xixón-Nantes diba recuperase gracies a estes aídes europees, Andecha Astur fexo una riestra entrugues al gobiernu español al traviés del Senador Jon Iñarritu, d’EH Bildu, -compañeros de la coalición europea Los Pueblos deciden de la que forma parte Andecha Astur- cuya rempuesta confirma la denuncia d’Andecha Astur de que taba vendiéndose fumu a los asturianos, embayándomos de nueu con inversiones pernecesaries, pero qu’a la fin queden en ná.

Concretamente la rempuesta del gobiernu español afirma testualmente qu’a díi de güei, el gobiernu español nun cunta con dengún proyeutu pa presentar a la convocatoria “d’aides del mecanismu CEF, Coneutar Europa, con 1.000 millones d’euros pa toa Europa”, pesia que’l plazu de presentación de solicitúes ábrese’l prósimu 14 xunetu.

Ello asina, afirmen que la única inversión prevista que pue beneficiar a Asturies nesi tarrén ye la que figura nel Plan de Infraestructuras, Transporte y Vivienda 2012-2024 (PITVI) que contempla’l Correor Cantábrico Bilbao-Ferrol ente les inversiones previstes.