Énte l’Estáu d’escepción xeneráu pola agresión del gobiernu español al traviés de les fuercies policiales, la victoria ye y sedrá de la democracia, del Pueblu Catalán y de tolos que lluchamos por un futuru nel que se reconoza a los Pueblos el Drechu a Decidir.

La victoria, polo menos la moral, yá ye del pueblu catalán, que cola so resistencia ta desenmazcarando un Estáu español violentu y dictatorial que se retrata a sí mesmu nos sos actos represivos. La detención ayeri de 14 presones, la mayoría altos cargos de la Generalitat, los más de 20 rexistros en departamentos, organismos, asina como en sedes polítiques y d’empreses y domicilios privaos, rematen el que yá vien siendo un estáu d’esceición en tola regla, con prohibición del aconceyamientu, anulación del drechu d’espresión ya incautación de medios democráticos, con usu continuu del acosu y la violencia. Les caberes noticies falen de policíes desplazaos a millares, barcos con guardies civiles ya inclusu de tanques, una esibición de fuercia bruta que nun dexa indiferente a nadie, yq ue recuerda a tiempos escuros.

Ello ansina, Andecha Astur reitera’l so sofitu al Pueblu Catalán na so xusta llucha pol Drechu a Decidir, y recuerda que lo que ta en xuegu nun ye solo’l futuru inmediatu de Cataluña, sinon el de tolos pueblos del Estáu , a los que se mos ñega la posibilidá democrática de decidir de forma soberana’l nuesu presente y futuru.

Nel mesmu sen, y cola mesma firmeza, Andecha Astur alvierte de los intentos de la izquierda española n’Asturies que, lo mesmo que fixeron na “transición” del 78, nun tienen problema en defender el Drechu a Decidir de Cataluña, falando incluso de “plurinacionalidá” como ye’l casu del PSOE, pero que n’Asturies son los responsables de que carezamos un Estatutu d’Autonomía y una istitución –el “Principado”- impuestos dende Madrid y qu’enxamás nun mos permitieren votar.

Ello asina, Andecha Astur denuncia la hipocresía y la gravedá d’aquellos que defenden n’Asturies los drechos nacionales de Cataluña y toleren y achanten énte la situación asturiana. La reforma de la Costitución española a mediu plazu pa reconocer los fechos y drechos nacionales va ser inevitable, y nun tamos dimpuestos a permitir qu’Asturies nun vea reconocíos los sos drechos nacionales y torne a ser rellegada a un tercer planu frente a otres naciones del Estáu.