Pediráse la intervención de la OLAF na cuestion del marafundiu de los Fondos Mineros, el so usu pa pagar servicios a sindicaleros que collaboraron col preslle de les mines, y guetará víes pa la intervención europea na contaminación ambiental que carez el nuesu país.

Les actividaes de la dellegación asturiana a Bruseles, rializaes en collaboración cola representación nel Parllamentu Européu de la coalición Los Pueblos Deciden de la qu’Andecha Astur forma parte dende un entamu, incluirán aconceyamientos con comisionaos del parllamentu européu y espertos nes materies a tratar, informando sobro la situación n’Asturies y estudiando formes d’intervención europea.

Ente otres ta previsto un aconceyamientu colos comisionaos europeos Roel Hoenders y Michael Klinkeberg, nel que pondráse enriba la mesa'l problema de la contaminación atmosférica n’Asturies, señalando a los principales culpables direutos y al gobiernu del “Principado” como responsables indireutos por omisión de la obligación de control. D’esti aconceyamientu espérses salir con propuestes concretes d’actuación que permitan presionar a les empreses más contaminantes y forciar al “Principado” a cumplir col so llabor, poniendo fin a les emisiones contaminantes illegales,  deteniendo si ye preciso la produción nes plantes industriales demientres nun pongan los medios afayaízos pa finar coles emisiones.

Nun podemos escaecer qu'a ca picu de contaminación correspuende direutamente otru picu d’ingresos hospitalarios por urxencies respiratories, nin que los casos de cáncanu de polmón y otres enfermedaes cróniques venceyaes a la calidá del aire nun faen sinón medrar, demientres los nuesos gobernantes nun faen más qu’entonar el canciu de la lluvia y sentase a esperar.

Per otru llau, dende Andecha Astur pidiremos formalmente la intervención de la OLAF (Oficina Europea de llucha escontra’l Fraude) nel casu del marafundiu de los Fondos Mineros, col envís de que se depuren responsabilidaes pol so usu fraudulentu, con especial mención al casu Villa, el xeriátricu Felechosa, y a les obres feches con financiamientu a cargu d’esos Fondos apurríos pola Xunión Europea pa la reactivación económico de les cuenques, qu’enxamás nun tovieren utilidá –acullá de financiamientos inregulares y caltenimientu de redes clilentelares- y qu’anguañu tan esbarrumbándose.