Nun ye namás Riopedre, Villa, Justo Rodríguez Braga… tol PSOE-SOMA-UGT ta enartáu nuna rede mafioso-clientelar financida cola xestión del esfarrapamientu del texíu socio-económicu asturianu.
Les detenciones y pasu pel xulgáu de Riopedre, Villa, y agora Justo Rguez Braga, asina como varios cargos municipales del PSOE; dende Campelo, es-alcalde de Llangréu, a Francisco Gzález, es-alcalde de Cuideiru, confirma les denuncies que vien faciendo Andecha Astur dende cuantayá de la esistencia d’una “trama asturiana” de corrupción y redes mafioso-clientelares entamaes dende’l PSOE y allegaos (SOMA-UGT) y con collaboraores necesarios n’IU y CCOO.
Dende la mesma denuncia de la traxedia del Pozu Nicolasa, cola implicación de les direiciones sindicales de CCOO y SOMA, al PGOU llaniscu, El Musel, el Niemeyer, la Zalia… pasando pol esfarrapamientu de los seutores productivos asturianos al traviés del financiamientu sindical y l’enriquecimientu de los sos cabezaleros, como ye’l casu de Villa, la “fiesta” de los fondos mineros, o la implacable rede clientelar alrodiu les sovenciones y la contratación d’obres y presonal nos Ayuntamientos, Andecha Astur vien denunciando reiteradamente la esistencia d’una trama asturiana de corrupción encontiada básicamente na xestión del esfarrapamientu del texíu socio-económicu asturianu.
Como nun podía ser d’otra miente nuna sociedá como l’asturiana, cautiva d’esi sistema mafiosu-clientelar qu’afeuta al conxuntu de los seutores sociales, y mui muncho a los medios de comunicación, les nueses denuncies siempres foron ignoraes, inclusu cuando dellos xulgaos vinieron dándomos la razón (PGOU de Llanes, fraude d’El Musel. El propiu sistema xudicial asturianu inhibióse ente munchos d’estos casos, teniendo na Fiscalía asturiana ún de los meyores sofitos a la hora d’echar tierra n’ellos.
Y lo mesmo qu’entós denunciemos esta rialidá, agora que paez que de nueu van tener que responder xudicialmente una parte d’esa mafia, reiteramos qu’esta trama ye imposible ensin el conocimientu y la implicación de presonaxes como Tini Areces o’l mesmu Javier Fernández, upáu a la presidencia del “Principado” pol mesmu Villa.
Ello asina, Andecha Astur, que conoz la incapacidá de les formaciones implicaes pa rexenerase internamente dau’l grau de xeneralización y tresversalidá del sistema mafiosu-clientelar nel que se sustenten, espera que l’aición xudicial entame a ser una rialidá que permita a los asturianos vemos llibres d’esta llacra, deseando una rápida actuación de la Xusticia en toles aliministraciones y organizaciones implicaes en casos de corrupción.
