La indeterminación llegal na que s’alcuentra la Academia la Llingua Asturiana y la falta de proteición que devién de la non oficialidá permite una situación d’indefensión xuridica que ye aprofitada pol PSOE pa tratar d’arrequexala comu “entidá privada”, -pesia deber la so creación como organismu públicu al Gobiernu preautonómicu – coles consecuencies qu’ello acarreta.
Nun ye d’estrañar que’l PSOE quiera allugar a l’a Academia la Llingua Asturiana fuera les competencies publiques, nun ye más qu’otru vergoñosu guelpe d’esti partíu na so guerra escontra la llingua d’Asturies. De fechu, quita-y la reconocencia a l’ALLA ye un guelpe maxistral, que supondría perder lo poco que tenemos avanzao y abrir definitivamente la puerte al desaniciu oficial del asturianu.
Yá anantes dende esti partíu consiguieron francer la unidá llingüística col invertu del gallego-asturianu, bloquiar la ensiñanza n’asturianu y quinxeron cubrise les espaldes con una Oficina/Serviciu de Política llingüística que nun tien más oxetu que caltener redes clientelares y alloñar la oficialidá con xestos ensin conteníos.
Sicasí, el mayor problema col que llucha anguañu la llingua asturiana nun son los enemigos conocios, sinon l’actitú pretendidamente favoratible ya’l posturéu de quienes remanen la illusión de los asturianos con falses promeses pero nun tienen envís real d’implicase nel so futuru. Ye descomanáu’l dañu fechu por partios que, como Foro, IU y Podemos dicen tar a favor de la oficialidá, pero ellí onde cunten col poder políticu pa facer d’esa demanda del pueblu asturianu una realidá nun lo faen, porque cola so actitú de piqueñes concesiones y xeitos vacios van queriendo engañar y conformar a los asturianos, allonxándolos al mesmu tiempu del que ye’l braeru oxetivu: la reconocencia de la llingua asturiana como un idioma de plenu drechu, daqué qu’enxamás nun podrá algamase ensin pasar anantes pola so Oficialidá.
La salida d’esta situación pasa por nun almitir como avance ná que nun seya la Oficialidá, dexar de combayar col «Principado» y denunciar el posturéu y la hipocresía de quien diz defender la llingua d’Asturies y a la fin actúa como un represor más.
