Fai falta una rempuesta frente a les polítiques del estáu español esfarrapando’l nuesu texíu económicu y condergándomos al paru, la precariedá llaboral y la emigración.
Frente a quien pretende faemos creyer qu’el paru, la precariedá llaboral y la emigración forciada de decenes de miles d’asturianos tolos años, nun ye más qu’una “llienda urbana” o quien pretende xustificalo esclusivamente como una consecuencia de les polítiques neolliberales, la movilización social ye la rempuesta necesaria. La destruición sistemática del nuesu texíu económicu respuende a una política d’asimilación españolista -cola complicidá necesaria del “Principado”- que pretende dexamos nuna situación de dependencia y debilidá frente a los intereses del Estáu español, la rempuesta na cai faise imprescindible.
La defensa d’un futuru dignu pal Pueblu Asturianu y la supervivencia d’Asturies como nación, pasa pola reivindicación de la Soberanía nacional y la costruición d’un sistema social xustu ya igualitariu. Vivir y trabayar n’Asturies, y faelo nunes condiciones afayaíces, ye una reivindicación inegociable.
Por eso, el 1 de Mayu, tien de ser una fecha de movilización y llucha, y por eso llamamos a la sociedá asturiana a movilizase como asturianos y trabayaores, amestándomos al manifestamientu entamáu pol sindicalismu combativu asturianu qu’agora mesmo representen CSI, CGT, CNT y SUATEA (Plaza L’Humedal de Xixón. 12:30 hores).
