Una nuea amuesa de l’asturfobia que domeña les actuaciones del Ayuntamientu de Xixón, en concreto, y del “Principado” en xeneral.
Andecha Xixón.- Depués d’aguantar feries d’abriles, procesiones de Selmana Santa, cellebraciones fuboleres, reggeatones, villancicos al altu la lleva y milenta atentaos acústicos y culturales más, una banda gaites toca nuna espicha, de tardi, nun llugar afayaízu pa ello –La Plaza’l Llavaeru, en Cimavilla- y ensin estorbar el tráficu. La policía multa a los gaiteros y obliga a retirar les pipes de sidre. El mensaxe rescampla: si ye asturiano, estorbayos.
El fechu de qu’al díi viniente –güei- tuviere convocada una concentración non silenciosa por parte de la mesma Banda Gaites multada –Villa de Xixón- fai albidrar qu’a l’asturfobia vien a amestase una peculiar rabia a aquellos que tienen l’enfotu de defender los sos drechos, y con ellos los de tolos asturianos.
Qu’aneciemos en ser nós, duel-yos. Que toquemos la gaita, que falemos la nuesa llingua, que bebamos sidre, que seyamos país, duel-yos. Pero duel-yos más cuando nun mos conformamos col ámbetu folclóricu, aptu pal turismu, y reclamamos lo de nueso.
Andecha Astur convoca a sofitar a la Banda Gaites Villa de Xixón na so concentración esta tardi, a les seyes, na Plaza l’Ayuntamientu.
