La cellebración del Díi d’Andecha afitaráse na vitalidá del Pueblu Asturianu y na so capacidá p’algamar una Asturies llibre, y afondará na reivindicación del 25 Mayu
La xornada de la organización, que se cellebrará n’Uviéu de magar les 13.30 hores entámase baxo’l llema «Un Pueblu Vivu, una Asturies Llibre», afitándose na vitalidá del Pueblu Asturianu y na so capacidá p’algamar una Asturies llibre, y afondará na reivindicación de la declaración de Soberanía de la Xunta Suprema en 1808 como primer actu d’autodetermín d’Asturies na dómina contemporánia, de tala miente que se presentará una iniciativa nesti sen na Xunta Xeneral, y fadráse un actu d’homenaxe a la mesma cola colocación d’un ramu lloréu a les puertes de la Sala Capitular onde tuvo llugar la mencionada declaración de Soberanía.
Dende un entamu, el Díi d’Andecha tuvo vinculáu al 25 mayu, cellebrándose davezu’l sábadu posterior a esa fecha, siempres reivindicada dende’l nacionalismu asturianu. Nesta XX edición afondaráse nesa vinculación aprofitando pa reclamar como aquel entós la superación d’una Xunta Xeneral y un “Principado” qu’enxamás nun fueron llexitimaos en referendum pol Pueblu Asturianu, y del actual marcu llegal que representa la Costitución española que mos torga a les estremaes naciones del Estáu español al llibre exerciciu del nuesu drechu a decidir.
La xornada tendrá tamién una importante parte llúdica, cola cellebración nos llocales de la organización n’Uviéu d’una espicha a les 13:30, cuntando tamién con una intervención política.
