Resulta inalmisible que se mos quiera vender como positives y esperanzaores dos midíes que, na so aplicación, rocen el surrealismu. Ya lo viemos venir cuando se fizo l’anuncia del usu del asturianu como llingua vehicular, mui guapo, pero mentira, puru posturéu. Teníemos razón. Agora aporta la reforma que tendría de favorecer la incluxón del asturianu n’educación infantil: lo mesmo, semeya pa la galería ya enfotu nulu.
Que los nuesos fíos depriendan na so propia llingua abulta un drechu indiscutible a estos altores de la historia y la obligatoriedá de falar a la reciella na so llingua materna nos primeros años d’escolarización ta recoyía en toles lleis educatives, arriendes de na Llei d’usu y promoción del asturianu, aprebada nel 1.998. La necesidá llegal d’aplicar esta cabera foi la qu’emburrió a redautar un artículu rellativu a la enseñanza del asturianu na etapa infantil.
La reforma lléndase práuticamente a un oxetivu curricular, ambiguu ya incompletu: «Descubrir y participar en dalgunes manifestaciones sociales, culturales y artístiques del so alrodiu, desendolcando una actitú d’interés y apreciu faza’l padrimoniu cultural asturianu y, nel so casu, el padrimoniu llingüísticu”.
Ensin conteníos, nin medios, nin ampliación de plantía, nin obligatoriedá alcontrámosmos con un plazu de tres años pa entamar a dar una única hora de clase d’asturianu, tou ello venceyao a una disponibilidá económica y a una voluntá que nun tan de dala forma aseguraos.
Más insultante ye entá’l Plan pilotu o esperimental del billingüismu, que se mos quinxo vender como proyeutu d’usu de la llingua asturiana como vehicular. Les condiciones pa ser un de los 6 colexos afortunaos son demenciales, másime teniendo en cuenta’l plazu de 16 díes que se da pa ello. Una vegada dientru’l proyeutu, la presencia del asturianu siguirá siendo aneudótica.
Plantegao namás pa un cursu (4º E.P) la midía queda nel aire, desconeutada dafechu del restu’l ciclu escolar y de la sociedá en conxuntu. Una hora a la selmana d’una sola materia, ensin profesoráu específicu, con inversión nula ya ensin obligatoriedá d’usar la llingua nes clases.
En resume, nada, otra tomadura de pelo cola qu’intenten conformar a los asturfalantes y enllenar titulares. Dende Andecha Astur desiximos la educación 100% n’asturiano y la oficialidá como únicu camín p’algamar los drechos llingüísticos que se mos ñeguen.
