Andecha Astur sofita esta propuesta cola llectura d’un comunicáu conxuntu que lleeran les muyeres de la organización.La propuesta xurdió yá l’añu pasáu del Movimientu de Muyeres Llibres del Kurdistán y la Plataforma de Llucha poles Muyeres Prindaes pola Fuercia, que faen un llamamientu a cellebrar esti Díi Internacional escontra’l Femicidiu ya’l Xenocidiu coincidiendo col tercer cabudañu de la campaña de Sinjar, y piden a les muyeres de tol mundiu que llean una declaracion al respeutu y caltengan, al empar, un menutu de silenciu a les once la mañana d’esi díi.
El tres d’agostu de 2014 ISIS atacó Sinjar/Shengal y masacró más de 5.000 persones Yazidi. Alrodiu d’otros 200.000 foron quien a escapar, pero ISIS capturó a 3.000 muyeres que siguen entá nes sos manes, y continúen garrando preses práuticamente a diario. Anguañu podemos celebrar la lliberación de Sinjar, que recuperó la so soberanía. Non asina les sos muyeres y la llucha del TJA y del exércitu kurdu –compuestu en bona parte por muyeres- continuará fasta que seyan quien a lliberales, a elles y al so pueblu.
Les muyeres d’Andecha consideren que «les kurdes son un exempu a siguir pa les muyeres del mundiu, yá que son les cabezaleres na llucha pola llibertá, la propia y la del so pueblu·.
El comunicáu conxuntu que se lleera a lo llargo’l díi ye’l que vien darréu:
Nosotres, muyeres de toles edaes, asturianes, xuntamos la nuesa voz a la de toles muyeres del mundiu, por toles que foron y son ca díe asesinaes, violaes, capturaes, abusaes, maltrataes…
La llácara del abusu, maltratu y asesinatu de muyeres afeuta a tolos países del mundiu, a toles cultures y a tolos niveles sociales y educativos, ensin esceición. Ya sea nel llar, na cai o nos conflictos armaos, la violencia escontra les muyeres ye una pandemia mundial, que mos afeuta nos ámbetos públicos y privaos.
Dende Asturies roblamos el manifiestu fechu guei poles muyeres kurdes y como elles, les asturianes decimo non.
Non a la mentalidá unilateral de dominación y patriarcáu, qu’implica arrogancia, robu, hostilidá, discriminación y racismu, tiranía, ocupación y sesismu. Decimos non a la modernidá del capitalism gobernáu por homes, que tornó’l mundiu nuna xigantesca zona de Guerra y desplaza pela fuercia a millones de persones. Decimos non a la infame mentalidá que vende a les muyeres nos mercaos d’esclavos y a la política de discriminación de xéneru contra les muyeres que col so discursu masculín y coles sos aiciones ataquen a les muyeres y a los movimientos creaos por elles.
