«Agora ye cuando más pricuru hai que tener cola Oficialidá y plantegase oxetivos posibles, como les Ordenances Municipales 
d’Oficialidá» afirma Lola Suárez.
«La Oficialidá llega, pero hai que curiar que llegue en condiciones y que nun se retrase más», la responsable de la estaya de llingua y cultura asturiana alvierte de la posibilidá de qu’agora que paez tar más cerca que nunca la oficialidá, acabe marafundiándose too con una «oficialida de mínimos», una «oficialidá en fases», galleguizando l’ocidente asturianu, o allargándose la so aprebación fasta l’infinitu».
Nesi sen recuerda que la modificación del estatutu impuestu que carecemos pa recoyer la oficialidá, requier una mayoría de 2/3, » lo que con un PP en posición d’españolismu xabaz resulta imposible», aparte, y respeutu al PSOE alvierte que «anque se vió obligáu a reconocer de pallabra los drechos llingüísticos de los asturianos ello nun quier dicir que tea dimpuestu a llevalo a efeutu, y yá tan condicionando la oficialidá a una supuesta reforma de la Costitución española que tendríe llugar nun futuru improbable y non precisamente en curtiu espaciu de tiempu, quiérase o non, el PSOE sigue siendo l’anti-Asturies».
Por eso afirma que «Agora ye cuando más pricuru hai que tener cola Oficialidá, que nun la marafundien, y non illusionase a lo fato pa llueu nun andar de baxón» y recuerda que pesia les bones pallabres d’unos y otros «lo cierto ye que los ayuntamientos onde gobiernen los que dicen tar pola oficialidá nun acaben d’aprebar unes Ordenances Municipales que garanticen los drechos llingüísticos de los vecinos», recordando qu’eses ordenances podríen afeutar a más del 75% de los asturianos si de verdá hubiera voluntá pa ello, pero «da la impresión de qu’hai más ganes de salir na semeya que de dar pasos efeutivos pola oficialidá, hai que siguir presionándolos en tolos ámbetos y nun fiase un res».
