Llucía Fernández reivindicó la continuidá na defensa de la Soberanía Asturiana, a lo llargo los sieglos, que resumió afirmando que “El filu que nun ruempe ye’l que fai texíu”.
El XXI Díi d’Andecha entamó cola rialización d’un actu d’Homenaxe a la Declaración de Soberania de 1808 a les puertes de la Sala Capitular onde tevo llugar tal fechu hestóricu, destacando’l calter popular del mesmu, que consiguió que la Xunta Xenera esistente p’aniciar una Xunta Suprema que fadría esta hestórica declaración na que reconoz esplicitamente la soberanía popular asturiana, xurando caún de los sos componentes que “ El poder, tol poder, reside y procede del pueblu”, y declarando en consecuencia la soberanía ya independencia d’Asturies, no que costitúi’l primer actu d’autodetermín d’Asturies na dómina contemporánia y un nidiu actu d’afirmación de la capacidá d’Asturies de ser dueña del so futuru.
Na so intervención Llucía Fernández, reivindicó la esistencia d’una continuidá hestórica na defensa de la Soberanía asturiana a lo llargo los sieglos, destacando tanto fechos hestóricos posteriores a la propia Declaración como’l que 210 años dempués de la mesma toviéremos ellí homenaxeándola. “El filu que nun ruempe ye’l que fai texíu” afirmó, y animó a los presentes a continuar nel llabor de superar l’Estatutu impuestu y la propia Costitución española en defensa del drechu del Pueblu Asturianu a decidir llibremente’l so futuru.
Notru sen tamién destacó’l silenciu cómpliz de les Istituciones del “Principado” qu’anecien en tapecer fechos hestóricos tan trescendentes como esti, ñegándose siquiera a retrucar a la propuesta que tolos años fai Andecha Astur nel sen de que se reconoza oficialmente’l 25 Mayu. Silenciu cómpliz que fexo estensivu al conxuntu de los partíos con representación na Xunta Xeneral, “A la fin son toos lo mesmo cuando d’Asturies se trata”.
Darréu del Homenaxe continuó la cellebración del XXI Díi d’Andecha con una Espicha popular nos llocales de la organización n’Uviéu, na que militantes y simpatizantes tovieren ocasión de compartir unos bonos momentos en comuña.
