Dientru’l marcu d’aición #andechar, Andecha Astur llanza la campaña “¿Y agora qué?” na que denuncia’l desaniciu planificáu de tolos seutores productivos asturianos: la minería, la industria, la pesca, la ganadería, l’agricultura y los tresportes, resaltando como úniques alternatives ufríes a la población el trabayu precariu o la emigración forciao.
Cola anuncia del preslle d’Alcoa entá nos oyíos, qu’amiesta una más a les cerca de 6.000 empreses menos n’Asturies de magar el 2008, con un saldu de 9.200 trabayaores despidíos, un aeropuertu que preslla el 40% les sos rutes esti iviernu, al empar que presllará la cabera mina asturiana, el serviciu de ferrocarril amoriando al tiempu que da les boquiaes el campu asturianu, cola ganadería y l’agricultura non solo desdexada, sinon torgada, la pesca vendía en trataos que nun protexeron nin a la nuesa mar nin a la nuesa xente, les multinacionales fuxendo y con pilancos pal aniciu de nueves empreses mui superiores n’Asturies que n’otres fasteres del Estáu; dende Andecha Astur convida a facer una reflexón: ¿Agora qué?
¿Qué mos queda a los asturianos? Podemos creyer el discursu oficial y optar por ún de los dos caminos que mos ufren dende Madrid y les sos sucursales n’Asturies: subsistir nun ermu económicu a base de trabayu precariu, o la emigración forciao, siguiendo a les decenes de miles d’asturianos obligaos a abandonar el país añu ente añu.
Pero n’Andecha Astur sabemos qu’esiste otra vía, que mos lleva a un futuru bien distintu: #andechar xuntos, afitando un proyeutu políticu de tresformación social que tea Asturies como marcu específicu d’actuación.
Nun podemos escaecer que toa esta llaceria nun pue ser casual nin culpa de la “cris”, comu demuestra que la recuperación d’Asturies nun siga’l ritmu del restu de les rexones d’Europa. Cuesta nun ver intencionalidá nel esfarrapamientu del texíu socioeconómicu d’un país qu’aporta a esta situación d’emerxencia, pero non partiendo de cero, sinon siendo un país industrializáu, ricu en recursos, con una población altamente formao y que fasta va pocu cuntaba con una cadarma productiva eficiente en tolos seutores.
Tan fundiedo Asturies a costafecha, desmantelándola y despoblándola nun xenocidiu diferíu que desangra’l país.
Poro, Andecha Astur llanza la campaña #andechar, cola que quier facer ver que n’actual coxuntura ye urxente articular un frente ampliu alrodiu d’un proyeutu de país y de sociedá a costruyir, especialmente agora cuando yá quedó n’evidencia que nun basta con qu’un partíu recueya unos principios sociales y económicos “d’izquierdes”, sinon que nun se pue defender Asturies siendo una sucursal madrilana y que pa costituyir una alternativa viable pa esti país ye imprescindible que lluche específicamente por y dende Asturies.
Nesi sen, fai un llamamientu al conxuntu de la sociedá asturiana a implicase nesti #andechar y a organizase nun procesu d’acumulación de fuercies nel que la tresformación social, la defensa de los intereses comunes del Pueblu Asturianu y la soberanía política seyan les exes alrodiu de les que confluyir.
