Andecha Astur desixe un repartu xustu de la Renta Social y la toma de midíes que finen cola situación precaria de miles de xixoneses
El despropósitu de repartir la renta social en función de la velocidá a la hora de presentar la documentación, anunciando d’antemán que la dotación total algamará escasamente p’asegurar los drechos d’unos 300 ciudadanos y cuando’l primer díi multiplicóse yá esa cifra por diez, convierte lo que yera una aniciativa exemplar nuna tomadura de pelu a los que pior lo tan pasando.
Dende Andecha Astur reconocemos que gracies a la Renta Social munches families xixoneses pudieron caltener l’añu pasáu un nivel de vida pasaeru, permitiéndo-yos pagar cuestiones tan básiques comu ropa y calzao, gafes, lletrodomésticos o un dentista. Somos coscientes de que tenía erros, comu cualisquier cosa que tea entamando, y por supuestu yera meyorable, pero’l so mayor fallu fo’l de nun algamar a cubrir les necesidaes de tolos que la solicitaren, más por escesu de necesidá que por falta de dotación.
El brutal amenorgamientu de la cantidá reservada nesta tercer edición de la renta social, dotada con una cuarta parte de lo que foron les ediciones anteriores, yá foi un güelpe pa les families solicitantes, pero’l sistema de repartu, priorizando l’orde de recepción de solicitudes anantes que’l nivel de necesidá, resulta un humildante exerciciu de publicidá valera de conteníu nel que se xuega coles esperances de quienes menos tienen.
Dende Andecha Astur desiximos, non solo un sistema de repartu xustu y una mayor dotación, qu’asegure que dengún xixones tea faltu de los bienes más básicos, sinón que denunciamos la situación de precariedá na que viven miles de persones a les que nun se-yos ufre oportunidá de salir d’esti bucle de dependencia y desiximos la puesta en marcha de midíes p’aniciar emplegos dignos que faigan innecesario medrar la dotación económica pa fines sociales. Lo que nun tien xacíu ye perpetuar una situación na qu’al menos ún de ca venti ciudadanos vive en riesgu d’esclusión social y probitú.
