Énte’l silenciu del Conceyu Llangréu (IU-Podemos) a la propuesta d’Andecha Astur d’aprofitar el Díi de la Costitución española pa facer una declaración a favor de la República Asturiana, Andecha Astur convoca un actu políticu esi mesmu díi 6 d’avientu en Llangréu.
L’avezáu silenciu del Conceyu Llangréu énte les propuestes que se-y faen dende Andecha Astur, cumplióse tamién nesti casu, nel que se pidía al equipu de gobiernu (formáu por IU-Podemos) que concretare’l so compromisu republicanu refugando la Costitución española, por monárquica y antidemocrática, posicionándose de forma favoratible a una República Asturiana.
Ello asina, Andecha Astur convoca pal 6 d’avientu -fecha na que l’Estáu español cellebra la Costitución del 78- un actu políticu en La Felguera, na Cai Belarmino Tomás a les 13:30 h., pa contraponer, frente a esa Costitución que ñega los drechos más ellementales al Pueblu Asturianu, la figura de la República Asturiana como garante de les nueses llibertaes individuales y colleutives.
Andecha Astur defende que’l propiu “Principado”, conxuntamente colos Conceyos asturianos entamen a xestionar el procesu costituyente d’una República Asturiana que tenga comu referente’l caberu marcu llegal que tuvo Asturies, el del Conseyu Soberanu d’Asturies de 1937, presidíu por Belarmino Tomás; un Conseyu Soberanu que foi menospreciáu pola República española, desfechu pola fuercia pol réxime facista de Franco ya ignoráu vergoñosamente nos tiempos de la cabera reistauración de la dinastía borbónica, heredera del réxime franquista.
