La xornada d’ayeri en Noreña foi un auténticu espaciu d’alcuentru, información y alderique.
L’entamu con un murial popular firmáu por Andecha Astur y Conceyu Abiertu por Noreña dio pasu a una xornada na que su cumplieron los oxetivos d’algamar un espaciu d’alcuentru, participativu, onde los asistentes fueron en tou momentu los principales actores y onde la República Asturiana y la mocedá nacionaliega foron los principales protagonistes.
La primer intervención “12 xides pa la República Asturiana”, a cargu de Mariano Suárez, punxo los pegollos nos que s’afita esta reivindicación hestórica del Pueblu Asturianu, y tuvo un corolariu especialmente interesante nel alderique que vieno darréu, onde ente otres coses, tratóse de la situación d’esi nacionalismu asturianu qu’acabó siendo una sucursal madrilana “ente lo asturiano y lo español hai una llinia de separtación, caún ye llibre de ponese onde-y paeza afayaízo, y mesmamente ponese a ún o a otru llau les vegaes que-y peta. Lo que nun ye llícito ye cruciar la llinia y dicir que se ta onde se taba, o que la llinia nun esiste”.
Asina mesmo, la intervención tamién derivó nes posibles llinies d’actuación pa faer rialidá esi oxetivu y fixar referencies prósimes p’avanzar nesi sen.
Darréu tuvo llugar la intervención de los representantes d’Ernai (mocedá nacionaliega vasco) qu’espunxeron la so llinia d’actuación, compartiendo reflexones y esperiencies nesti campu, que nel alderique que surdió darréu foron puestes en comparanza cola rialidá que vive la mocedá asturiana, onde la situación de precariedá llaboral y la presión istitucional forciando a emigrar llega a producir una auténtica desestructuración de la mocedá asturiano, en tantu que la emigración destruí el propiu texíu social nel que se desendolca. La necesidá de proyeutos integraores qu’asuman problemátiques xenériques de la mocedá pero afitando un marcu específicu d’actuación como ye Euskal Herria nun casu, y Asturies n’otru, fo’l puntu de coincidencia xeneral.
Darréu taba previsto la intervención de Antonio Martínez, conceyal de Conceyu Abiertu por Noreña, desplicando la esperiencia de CapN como candidatura de xunidá popular, pero l’horariu echóse enriba nun permitiendo entrar nella.
A la fin del Alcuentru’18 y ente la prohibición de cellebrar el conciertu previstu, tuvo llugar una concentración delantre l’Ayuntamientu Noreña, onde tomó la pallabra Mariu Arbesú, que fexo un repasu a la hestoria d’Andecha Astur nel conceyu y a la esperiencia de Conceyu Abiertu por Noreña, con dos llexilatures. Agradeció la collaboración de los presentes nesta xornada y, como Andecha Astur de Noreña, comprometióse a seguir afondando na xera y na llinia de lo que foi l’Alcuentru’18 n’algamar un espaciu propiu y autoxestionáu pa la mocedá de Noreña, y a facer esi conciertu qu’esta vegada prohibieron.
L’actu finó cola actuación improvisao de miembros de Musicos xuníos por Noreña, que canciaron Santa Bárbara Bendita.
Una esperiencia p’avanzar!
