Énte la propuesta de creación d’un Ária Metropolitana qu’acomuñe a los conceyos más poblaos d’Asturies, Andecha Astur quier alvertir de los dos pelligros qu’empreslla esti plan. Per un llau, el desdexamientu entá mayor de les fasteres menos poblaes y pel otru, la previsible nacencia d’otru “chiringu” que valga al PSOE p’autofinanciase, repartir puestinos y caltener les sos redes clientelares.
Nun puede ñegase que, de fechu, n’Asturies esiste yá lo que se pue considerar un ária metropolitana na so fastera cientral, y que la mesma debiere, pol so pesu económicu y poblacional, cuntar con un tratamientu específicu adautáu a les sos necesidaes, ya inclusu aprofitar les aídes estatales y europees a les que tendríe acesu, pero ello tien de tar enartao nuna visión nacional d’Asturies, que contemple una articulación efeutiva de tol territoriu, y tien que cuntar con unes garantíes de transparencia, y un control económicu y democráticu que torguen qu’acabe siendo otru ñeru de financiamientu del PSOE y les sos redes clientelares; garantíes que fasta agora naide nun ta plantegando.
Sicasí, lo que ta poniéndose enriba la mesa ye l’aniciu d´una fastera urbana cientral privilexada arrodiada por unes esnales desdexaes (más entá) nes que morarien asturianos “de segundu orde” que, llóxicamente, fadrán por desplazase a la fastera con más servicios, agravando’l problema del abandonu rural y el despoblamientu.
A la escontra, la propuesta d’Andecha Astur ye tomar les midíes afayaíces pa caltener y meyorar comunicaciones y servicios nel ária metropolitana esistente y apostar al tiempu por recuperar la cadarma de “Poles” tradicional nel país, ello ye, reforciar polos de desendolcu económicu ya industrial espardíos estratéxicamente pel territoriu nacional, de forma que se corrixan les desigualdaes estructurales agora mesmo esistentes y se caltenga’l texíu socio-económicu tradicional asturianu.
