Frente la inactividá del “Principado” y de los grupos ellí representaos, Andecha Astur presenta énte’lel Senáu una riestra entrugues col oxetu determinar responsabilidades y apuntar igües.
Les entrugues, presentaes por Jon Iñarritu, senaor d’EH Bildu –organización coalligada con Andecha Astur en Los Pueblos Deciden- pretenden determinar el grau de responsabilidá del gubiernu cientral y más concretamente de la Confederación Hidrográfica del Cantábricu (CHC) dependiente del Ministeriu español pa la Transición Ecolóxica y dirixíu anguañu por Teresa Ribera Rodríguez (PSOE).
Unes inundaciones qu’arriendes de los cuantiosos daños materiales, convién recordar que causaronla muerte de 4 presones, mentes el presidente del “Principado” alcontrábase de feria en Madrid, ensin qu’ello lu fixere interrumpir les sos actividaes nin tornar a Asturies; y mentantu, el parllamentu asturianu acumula meses d’inactividá ensin llegar aconceyar.
Nel mesmu sen, Andecha Astur considera inxustificable la inactividá de los senaores asturianos qu’a díi de güei entá nun presentaren denguna triba d’iniciaiva al respeutu, nin s’esmolecieron por esclariar los fechos y determinar responsabilidaes, conformándose nos más de los casos a rializar declaraciones valeres ensin otra función nin conteníu que la utilización mediático de lo sucedío.
A la escontra, les entrugues presentaes nel Senáu por Andecha Astura atalantamos que servirán non solo pa pasar del tarrén de la suposición a los fechos y determinar les debíes responsabilidaes, sinon que facilitarán que dexen de repetise fechos y situaciones como les que son oxetu de les entrugues rializaes y que s’espeyen darréu:
- ¿Cuala ye la xida polaque la Confederación Hidrográfica del Cantábricu, enantes de les inundaciones del mes de xineru n’Asturies, sólo desendolcare un númberu mínimu d’actuaciones ya invirtiere namái un 26% del presupuestu vinculáu al plan de llimpieza y caltenimientu de calces puestu en marcha en 2018?
- ¿Qué planes d’intervención urxente tien la Confederación Hidrográfica del Cantábricu sobro los ríos asturianos pa torgar nuees inundaciones comu les sofríes nel mes de xineru? ¿A qué ríos asturianos afeuten eses intervenciones previstes? ¿En qué consistirán eses intervenciones? ¿En qué feches se pondrán en marcha dichos planes d’intervención? ¿Cuántu dineru se va invertir na aplicación d’esos planes?
- ¿Dispón el Gobiernu o la Confederación Hidrográfica del Cantábricu de dalgún informe de les causes y posibles soluciones de les inundaciones padecíes n’Asturies nel mes de xineru?
- ¿Dispón el Gobiernu de dalgún informe sobro los daños, y la valoración económica d’éstos, que les inundaciones de xineru n’Asturies causaron en carreteres, víes ferroviaries, centros sanitarios, edificios e infracadarmes públiques, viviendes y propiedaes particulares, fasteres agroganaderes, industries y comercios?
- ¿Dispón el Gobiernu d’un mapa actualizáu de fasteres inundables d’Asturies?
- ¿Pa torgar posibles catástrofes futures, qué planes d’actuación tien previstos el Gobiernu pa les 6.560 hectárees que son inundables polos ríos asturianos y nes que viven más de 6.300 presones? ¿En qué consisten esos planes? ¿A qué conceyos asturianos afeuten? ¿Cuándu se pondrán en marcha? ¿Qué inversión presupuestario representen?
- ¿El Gobiernu disponía, enantes de les inundaciones de xineru n’Asturies, de dalgún informe sol nivel de caltenimientu de les víes ya istalaciones ferroviaries de la empresa FEVE: estáu los terremplenes, estáu les trincheres, estáu los túneles, estáu les pontes, estáu llimpieza de les veres de los ríos que van al llau les víes? ¿De qué fecha ye’l caberu informe al respeutu? ¿Qué iniciatives tomó’l Gobiernu dende entós pa torgar que posibles inundaciones afeutaren al sirviciu ferroviariu de FEVE n’Asturies?
- ¿Qué midíes va tomar el Gobiernu pa torgar que prósimes inundaciones prevoquen otra vuelta situaciones inédites, comu’l recién pieslle de tola rede de FEVE na fastera central asturiana?
- ¿Cuántes presones tán emplegaes por empresa pública nos llabores de caltenimientu de la rede ferroviaria de FEVE n’Asturies?
- ¿Camienta’l Gobiernu que la causa cimera de los daños prevocaos poles inundaciones sofríes en xineru n’Asturies ye la falta de suficiente inversión de presupuestos estatales na llimpieza de calces fluviales, caltenimientu carreteres y redes ferroviaries y en planes de prevención d’inundaciones?
