Andecha Astur pide desplicaciones al Conceyu Parres poles pasaes inundaciones de xineru

La propuesta trata de determinar responsabilidaes pola costruición del hospital Francisco Grande Covián en tarrenos inundables, y del desdexamientu por parte de dichu Conceyu del seguimientu de les obres interrumpíes pola Confederación Hidrográfica’l Cantábricu (CHC) en 2015

 La propuesta complementa les entrugues presentaes nel Senáu español en nome d’Andecha Astur pol senaor Jon Iñarritu (EH-Bildu) pa determinar responsabilidaes, igües ya iniciatives poles inundaciones del pasáu mes de xineru.

Asina mesmo recueye que, nel intre de debatir nel Plenu Municipal la propuesta agora presentada, se reconoza a un representante d’ANDECHA ASTUR el drechu a sopelexar delantre’l Plenu, enantes de la lletura, debate y votación de la propuesta, el so paicer sobro la necesidá y procedencia de la propuesta agora presentá.

 PROPUESTA PA LA DETERMINACIÓN DE RESPONSABILIDAES POLA COSTRUCIÓN DEL HOSPITAL FRANCISCO GRANDE COVIÁN EN TARRENOS INUNDABLES DEL CONCEYU PARRES

 A los efeutos de xustificación d’esta propuesta considérense los fechos que darréu se rellaten:

1.  L’Hospital Francisco Grande Covián, del Oriente d’Asturies, costruyóse nun tarrén consideráu inundable na cartografía del entós Ministeriu español del Mediu ambiente.
2.  Un estudiu del Istitutu de Recursos Ñaturales y Ordenación del Territoriu (Indurot), de la Universidá d’Uviéu, fechu por destacaos espertos urbanistes asturianos, calificó l’índiz de riesgu por inundación de la fastera onde ta’l mentáu hospital comu de grau 3 (el másimu d’esta escala ye 4).
3.  Tolos especialistes coincidieron, enantes de la naguración del hospital, en que, en dengún casu, se debiere d’autorizar la so costrución en plena vega d’inundación del ríu Piloña.
4.  Los espertos coinciden tamién anguañu: l’asitiamientu l’hospital güei nun sedría autorizao pola Confederación Hidrográfica del Cantábricu, muerganismu competente nesta materia.
5.  Esti hospital surdió comu idega en 1981, na dómina del ente preautonómicu “Consejo Regional de Asturias”, presidíu por Rafael Fernández (PSOE) y con Javier Vidal comu Conseyeru Sanidá (entós na UCD, güei en Ciudadanos).
6.  Yera entós alcalde de Parres Emilio Pando (PSOE).
7. El so sucesor, Manuel Alonso Nieda (PSOE), que foi alcalde ente 1983 y 1991, tamién foi ún de los principales defensores de la costrución del hospital nestes condiciones.
8.  Esta propuesta de costruyir un nueu hospital ñació comu un pautu ente’l PSOE y la UCD.
9.  Los tarrenos pa costruyilu (40.000 metros cuadraos) mercáronse en 1985 a tres vecinos del llugar de Castañera (Parres), por un preciu de 28 millones de pesetes (unos 168.000 euros).
10.  El Conceyu Parres pidió d’aquella un créitu millonariu, mercó los tarrenos, recalificólos y cediólos al “Gobierno autonómico”, presidíu por Pedro de Silva (PSOE) y con Juan Luis Rodríguez-Vigil (PSOE) comu conseyeru Sanidá.
11.  Cuandu s’entamó la costrución d’esti hospital les competencies en materia sanidá entá taben en manes del Gobiernu español. Comu ésti se ñegó a costruyir un hospital nel oriente d’Asturies, magar que yera bien necesariu, el “Gobierno autonómico” idegó en marzu de 1995 l’entamu d’una Fundación privá qu’entamare y xestionare esi hospital con fondos públicos; asina foron socios fundaores el “Gobierno del Principado” (10 millones de pesetes, 60.000 €), el Conceyu Parres (200.000 pesetes, 1.200 €; amás de los tarrenos), la mancomunidá del Oriente y dellos particulares.
12.  L’Hospital Francisco Grande Covián entamó foncionar el 2 de xunu de 1997 y naguróse oficialmente’l 8 de xunu de 1998.
13.  Na fase de conceición y diseñu’l proyeutu yá hebio un gran alderique sobro la conveniencia d’asitialu nel barriu Castañera, en plena ribera’l ríu Piloña. Foron milenta les voces qu’entós señalaron el pelligru de llevantar un hospital en tierres de crecía del calce fluvial. Sicasí, toles alministraciones dieron el so vistu bonu y los sos permisos pa la costrución del hospital nestes condiciones.
14.  Col formatu de fondación privá rixóse l’hospital fasta setiembre de 2008, cuandu pasó a ser Fondación pública, ascrita al SEPSA. Y en mayu de 2010, tres una larga llucha social, magar la total oposición del Gobiernu’l PSOE presidíu por Vicente Álvarez Areces, esti hospital integróse comu un centru más na rede d’hospitales públicos con xestión direuta del SESPA.
15.  Eso sí, dende la so apertura l’hospital yá sufrío abondos episodios d’inundaciones y varios d’evacuación y clausura por esti mesmu motivu (dióse’l casu mesmamente, en 2010, de tener qu’evacuar 70 enfermos en llanches).

Poro, Andecha Astur propón al Plenu’l Conceyu Parres:

1.  Qu’entame iniciatives polítiques y llegales pa depurar les posibles responsabilidaes de los alcaldes de Parres, presidentes del “Gobierno autonómico” de Asturies y conseyeros de Sanidá d’Asturies que tuvieron implicaos na planificación y costrución del Hospital Francisco Grande Covián en tarrenos inundables del Conceyu Parres.
2. Que, arrespondiendo al so compromisu de ser un Conceyu democráticu, facilite información público en materia d’inundaciones nel so territoriu, retrucando a les siguientes entrugues

• ¿El Conceyu Parres conoz el plan qu’en 2015 redautó la Confederación Hidrográfica’l Cantábricu (CHC) pa la proteición de Les Arriondes en materia d’inundaciones fluviales? 
• ¿Qué prepuestu públicu conoz el Conceyu Parres que taba o ta destináu a l’aplicación d’esti plan?

   ¿El Conceyu Parres conoz les causes poles qu’esi plan de la CHC tuvo paralizáu dende 2015 fasta anguañu?

•  ¿El Conceyu Parres sabe cuálos foron los responsables públicos que paralizaron el plan de la CHC pa la proteición de Les Arriondes en materia d’inundaciones fluviales?
•  ¿Qué iniciatives tomó’l Conceyu Parres dende 2015 fasta agora pa intentar la revitalización d’esi plan de la CHC?
•  ¿El Conceyu Parres conoz la fecha en qu’esi plan va entamar a llevase a cabu de manera efeutivo?